Eñaut Izagirre, Euskadiko junior garaile

Joan zen igandean, hilak 19, 2009ko mendi-eskiko Euskadiko Koparako azken lasterketa puntuagarria jokatu zen: Ral-li CEC. Katalunian izan zen, Conangles bailaran, Vielhako tunelaren hegoaldeko sarreratik gertu. Eski denboraldia gogoz amaitzea nahi zuten 125 partaide elkartu ziren bertan. Horien artean, Eñaut Izagirre elgoibartarra ere bai.

Goizeko zortzietan abiatu ziren lasterkariak. Lehenengo kilometroak korrika egin ondoren, eskiak oinetan jarri eta 900 metroko desnibel positiboa igotzeari ekin zioten, pare bat korridore tartean zituztela. 2.800 metro garai zen tontor bat igo ostean, 1.100 metroko jaitsiera eginez bukatu zuten lasterketa.

Eguraldiak lagundu ez zuen arren, partaideen artean giro aparta izan zela esan digu Eñautek: “Euskadiko kopako azkeneko lasterketa zela kontuan izanik, giro bikaina izan zen une oro”.

Azkenean, Eñaut Izagirre elgoibartarrak 2. postua lortu zuen senior “promesen” sailkapen orokorrean.

Euskadiko kopa 5 lasterketa izaten dira, eta horietako bakoitzeko sailkapenaren arabera puntuak lortzen dira. Ondoren, urte amaieran, puntu guztiak batuta sailkapen orokorra egiten da.

2009a urte bikaina izan da zalantzarik gabe Elgoibarko eskiatzaileentzat. Lasterketa honetan lortutako puntuekin, Eñaut Euskadiko Kopako junior garailea da.

Krono-igoeran, Eñaut bera Euskadiko txapelduna izan da juniorretan eta Iñigo Larizek hirugarren egin du.

Zorte txarragoa eduki dute aste-bukaera honetan denboraldia biribildu nahi zuten elgoibartarrek. Iñigo Lariz, Iker Leonardo eta Arkaitz Irureta Italiaraino joan ziren Mezzalama eski alpinismo proba entzutetsuan parte hartzeko. Munduko hiru lasterketa garrantzitsuenetako bat da, eta garaiera du ezaugarri nagusi, 4.000 metrora maratoia egiten baita; Cerviniatik hasi eta Castor eta Naso de Lyskam 4000mko mendiak egin ondoren Gressoney-ra jaitsi behar dute parte-hartzaileek.

Apirilaren 19an zen lasterketa, baina goizeko 5etan irteera eman baino 5 minutu lehenago bota zuen elurteagatik bertan behera utzi zuten proba. Bi urtean behin egiten den proba klasiko hau Maiatzaren 2ra atzeratu duten arren, elgoibartarrek ez dute erabaki maiatzeko zubian Italiara itzuliko diren.