Elgoibartarrak Alti Toyn

Joan zen astebukaeran urtarrilak 31-otsailak 1 euskadiko koparako puntuagarria zen open Altitoy mendi eskiko proba jokatu zen Luz-Saint Sauveur inguruetan.

Hasiera batean astebukaera osoko mendi eskiko jai handi eta ikusgarri bat izan behar zena erdira murriztu zen astean zehar izandako gertakariengatik. Hain zuzen, elurjauzi baten ondorioz mendi sorospen taldeko gendarme bat (CRS) zendu zen. Hau dela eta “prefeta”k ez zuen proba osotasunean joka zedin baimenik eman eta azken unerarte bertan behera gelditzeko arriskua egon zen. Baina antolakuntzak egindako izugarrizko ahalegin eta lanaren ondorioz larunbatean prestaturiko mendi ibilbide bat burutu zen eta igandean benetako festa bizi izan zen Bareges inguruan.

Lasterketa hauetan ohikoa den bezala luzeerari dagokionez bi ibilbide egoten dira. Baina zailtasunari dagokionez bi ibilbideak alpinoak eta ikusgarriak egiten ahalegitzen dira. Ibilbide luzeena A delakoa, konpetitiboa izaten da bertan estatuko eta Andorrako eskiatzailerik onenek hartu zuten parte. B ibilbidea, ostera, ibilbide herrikoia da eta giro aparta bizi izan zen partehartzaileen artean. Esan beharra dago Pirinioetan antolatzen diren eski frogetatik arrakastatsuena dela 550 partehartzailek izena eman zuteneta.

Bertan hamabost bat elgoibartarrek parte hartu zuten, elgoibarren kirol ikusgarri honek duen arrakastaren erakusgai. Hauek animatzera beste horrenbeste herritar hurbildu ziren eta igandeko proba bakarrik izan arren antolakuntzaren trazaketa lan onak, eguraldi apartak eta giro ezinhobeak asebeteta utzi zituen elgoibartar guztiak.