Nire maitasuna

Nire maitasuna

pantailatik ihes egin zuen filma da.

Pasabidetik urruntzen ikusi nuen

burlazarrean.

Beste baten besoetan jausi zen

ni izorratzeko besterik ez,

haren ezpainak musukatu zituen

nireak lehortzearren besterik ez.

Nire maitasuna

geltokirik ez geraldirik gabeko trena zen.

Hurbiltzen ikusi nuen

leihoak burlaka zebilen jendez mukuru.

Sama jarri nuen errail hotzean

eta trena errailetatik atera zen

ni aforratzeko besterik ez,

ni hiltzea ere ez zuen desio.

Nire maitasuna

hasierarik gabeko abestia zen.

Besteen belarrietan entzun nuen

burlaka.

Hurbildu nahi izan nuen

eta tinpanoak hautsi zizkidan

ukabilkadaka

nota hura entzunarazteko besterik ez,

harrezkero bueltaka dabilkidan nota hura,

desafinatua,

errepikatua,

amaierarik gabeko amaiera eternoa luzatzen,

nire maitasunaren buztan luzea balitz bezala,

narras eraman beharreko kondena.

Ron Sniakin