Adituak

Maite ditut gure adituak,

geopolitikaz dena dakitenak.

Besteok

kapitalismoaren atzaparretan bizi garen

ergel-tropa gara,

ilargiari barik atzamarrari

begiratzen diogun ezjakinen artaldea.

Zeren adituen atzamarrek

etsaiari seinalatzen diote,

haiek bakarrik dakite zein den

pelikulako gaiztoa,

munduaz jabetu nahi duen maltzurra,

bidegabekeria guztien erruduna,

gerra eta triskantza ororen iturri agortezina.

Munduan gaizto bakarra balego lez...

Eta despistatzen bazara,

adituek esaten dizute ez dela estrategikoa

beste gaizto bati seinalatzea,

zeren hori etsai nagusiaren amarrua da.

Gaizto nagusiari aurre egiten dion gaiztoa

barkatuta dago,

euren seme-alabak jo eta bortxatzen baditu ere:

hori salatzea etsai nagusiak bultzatutako distrakzioa da.

Baina lasai: adituek esango dizute

zer kritika daitekeen eta zer ez.

Eta kontuz: euren ildotik ateratzen bazara

susmagarria zara,

askatasunaren izenean berba egiteko monopolioa

haiena baita.

Adituek banatzen dituzte gizartean

ezjakintasun-tituluak,

haiek dira antikapitalismoaren bisionarioak,

iraultzaren manamenduak ezartzen dituzten profetak,

eta,

euren txioen txorrotadarekin

ongiaren eta gaizkiaren territorioa markatuta,

asteburua heltzen denean,

Landetara joaten dira euren autokarabanetan.

                                                                                                                         Bernardo Kapanaga