Trafikante guztiak horrelakoak izango balira...

Eguna hortik zehar pasa ondoren etxera iritsi naiz. Ez dakit nekea edo izan den baina dexente kostatu zait ateko serraila irekitzea, azken egunetan nahiko gogorra dago… edo ni iristen naiz gogortuta etxera, seguraski azken hau izango da.

Bakeroetako azken bi botoiak askatu eta sofan bota naiz. Etxean telecinkoko (letra txikia boluntarioa da) telediarioa ikusten ari dira. Berriemaile bat aukeratu beharko banu ez nuke berluskoni (txikia boluntarioak baita ere) hautatuko baina kasu honetan ez dut berriemailerik nahi. Horrelakoetan etxera iritsi eta lepoatzean dudan “off” botoiari sakatzea gustatzen zait, ondoren kraneoan dudan kremailera ireki eta burmuina ateratzen dut formolezko pote batean sartzeko. Hurrengo goizean esnatzean, kontrako prozesuari ekiten diot. Ez dut burua ezertarako izaten, gutxiago munduko arazoez pentsatzeko (jarrera honekin ez dugu etorkizun handirik baina zer egingo diogu ba? Nik egunean zehar pentsatzen dut eta normalean gutxi).

Harira itzuliz, hara non telediarioan neska lirain bat agertu den, triste dago, ilun. Kartzelan omen dago Cancunen. Ematen duenez, eztei bidaietik itzuli behar zirenean aireportuan ekipajea mihatu eta bertan, bala batzuk eta detonadore bat aurkitu dizkiote!! Gizajoa!! Trafikante zikinak! Neska ezkonberri, lirain, jator, zuzen eta ezkontza arte birgina izan zen Espainiaren neska-lagunari azpijokoa egin diote. Trafikanteek, droga pasatu nahian eta neska hontaz batere errukirik izan gabe, bala batzuk eta detonadore bat sartu dizkiote Cancungo bazar tradizionalean erosi berri zuen poltsan. Gizarajoa, amu bezala erabili dute! Polizia neskaren detentzioan itsutu zen bitartean kokainaren kartel mexikarrak aireportuko beste aldetik nahi zuen guztia pasatu du.

Zein gaiztoak diren trafikanteak, zein maltzurrak! Hortan dabil berluskoni (ez du letra larririk irabazi oraindik), eta horretan aritu omen dira egun guztian bere lagun Ana Rosa eta baita Gemma Gartzia ordiziarra ere (letra larriak jarri dizkiet baina berluskoni izorratzeagatik bakarrik). Hauek, betiko moduan, norbait noiz hilko itxaroten ari ziren bere izenean telebista ordu batzuk betetzeko eta hau aukera latza izan da noski.

Gauean Teleberriak ikusteko gogorik ez dut izaten baina goiz eta arratsaldeko progamazioa ez da hobea izaten. Hauek ere burmuina formolean sartuko balute… askoz zoriontsuago biziko ginateke zalantzarik ez. Baina mesedez, egunez egin dezatela, baita berluskonik ere.

Hala ere, ez da hau ateratako ondoriorik garbiena. Inor konturatu al da trafikante horiek santu batzuk direna? Behin putada eginda, nahikoa zuten Cancungo bazar tradizionalean eskuratutako poltsan kokaina gramo batzuk sartzea. Horrela, gure neska lirainak bizi osoa atzerriko kartzela batean pasako zuen (ez zen lehena izango eta ezta azkena ere). Trafikante hauek “Santu Baroi” batzuk dira! Drogak trafikatzeaz denok izan gaitezko susmagarri baina detonadore bat eramateaz… (berluskoni again). Detenitu zuten unean bertan, garbi zegoen hamabost egunetan etxera itzuliko zena. Behin trafikatzaileak izan behar badute, mesedez, izan daitezela denak horrelakoak! …Hori bai, Bin Ladeni mesedez, segi kokaina sartzen, inork ez daki zer pasako zaion burutik gure zeruak zeharkatzen ari dela (honi ere larriak jaja)