Hainbeste zeru

Bidaia, bide da ia. Lauron bide. Joan eta egon, egon eta segi joaten.

Ebroko Deltako zerua, zerua eta lurra, lurra eta ura, ura eta hegaztiak, hegaztiak eta haize zakarra, haizea eta eguzkia, eguzkia eta ilunabar infinitua, infinitua eta pasiozkoa, pasiozkoa eta, hainbeste zeru, hainbeste argi, hainbeste, hainbeste zeru.

Lertsuntxoak, lertsun hauskarak, ubarroiak, flamenkoak, arranoak, ahateak, kopeta zuriak, eta zenbat txori txiki.

Txori txiki politak

Ebroari kantari

Hainbeste, hainbeste txori...

---

Traiguera herrian, eta inguruko beste askotan, mila urtetik gora duten milaka olibondo daude. Mila urte edo gehiago dituzten zuhaitz zaharrak, dirauten zuhaitzak, bizi-bizirik eta emankor, urrea bera opari emanez. Eta zer sentitzen den halakoen aurrean? Zoriona, itxaropena, hain izaki ederrak direlako, ehundaka lagunek zaindu dituztelako, eta oraindik ere zaintzen dituztelako, eta zainduko. Dena ez dugulako suntsitu.

Hau idazterakoan, beste iluntze errepikaezin bat, existitzen diren urdin guztiak munduko pantailarik zahar, handi eta aldakorrenean. Eta hantxe zintzilik, belarritako dotore bat, urrezkoa, Valentziako iletargia.

Marjal de Pego-Oliva