Topa

Zaldi busti baten ibilera eduki arren

harean ahate herrenaren oinatzak uzten zituen

neskagatik.

Oinatz bakoitzaren barruan ezkutatzen ziren

gure asaben opiozko argazki sepiengatik,

zure apartamentu titanlux usain berrituan

zintzilikatu eta urkatu dituzun

Nikolas Lekuonaren koadroengatik.

Ukitzean pozoi eta ke bihurtzen diren

laranja esferatuen zaporeko hitzengatik.

Barkamena erlojuen barruan

sartzen ez zela esan zuen keroseno saltzaileagatik.

Toalla zuri bat astinduz bake zeinua egin zuen

hitz ezinbestekoaren xerkatzaileagatik.

Santimamiñeko bisontea margotu ondoren akiturik

otso beltza larrutu eta bere odola edan zuen

aztiagatik,

azti beltzaren odola edan zuen

otsoagatik,

hormako bisonteari begira liluratu ziren

homo homini eta lupus lupi guztiengatik.

Casablancako piano barruan esbastika itxuran

kizkurturik bizi zen legez kanpoko etorkinagatik.

Ontzia jo zuen izebergaren damu isil

edo aitortu gabeko satisfazio harengatik,

klarinetea abandonatu eta uretara jauzi egin zuen

orkestrako gazteagatik,

Titanic izeneko hiltegietako txahalen

begi irekiegiengatik.

Jon Miranderen anfibio disekatuen bildumako

igel bategatik.

Itxoin Itxoin Apur Bat edo Trena Galduko Dut Maitea

edo antzeko esaldiak toteldu

edo sikiera noizbait pentsatu izan dituztenengatik.

Trenbidean harri trokoen ordez marrubiak dauden

erresuma faltsu eta ederragatik,

suizida asetu eta musugorrituengatik.

James Deanen irudi eskubideen

ustiapen egokiagatik.

Sherpa hasberriak sei mila metrotan erre zuen

Ducados zigarroaren azken kaladagatik.

Jennifer Jason Leigh Georgia filmeko kartelean

eserita zegoen ohe deseginagatik.

Jennifer Jason Leigh beragatik.

Aire katastrofe bat gogorarazten duen besarkada

ezusteko eta samurragatik.

Egunsentiro oilarren mokoa bozatzen duen

alanbreagatik.

Tabernazuloan desorekatzen diren Philippe Petit

ekilibrista koldarrengatik.

Eguzkiaren lehen izpiek eragindako

errezo epelaren aurretik eztarria

garbitu beharrik ez duen haurragatik.

Lazkao Txikiren aterkiagatik.

Umorea galdu gabe desesperatzen dakitenengatik.

Edozein blues kantariren hortzetako zepilloagatik.

Raymond Carverrek idazmakinaren kontra

txikitu zuen botilako isurkin identifikatu gabeagatik

edo Carverrek berak

baporetik lakioaz harrapatzen zituen

itsasertzeko zaldi bustiengatik.

Honegatik guztiagatik,

eta kopa honetan, eta zure oinatz ttipietan

egundo sartzen ez diren

beste arrazoi batzuengatik.

Topa.

                                                                                                        Harkaitz Cano