Estazioko poeta

Baliteke errebelazio tankerako zerbait izatea.

Ekidin ezin eta askatutako,

izkiriatutako nahiz soilik, pentsatutako

pentagrama solteak…

…poesia

Luma orri gainean balaztarazten duena bakarrik ez dela poeta

esan zidala noizbait

norbaitek

nonbait…

oroitzen dut.

Eleak konposatzea ez dela aski

guztiok barnean dugun poetatxo ezezagun

ezaguna

kanporatzeko,

haren bitartekari izateko norberaren bokazio/ofizio

            Poeta

                        filmetako hirugarren planoan ageri den

                        extra difuminatu oro ere bai baita.

            Poeta

                        zilarrezko paperezko pilota,

                        inprobisatua,

                        kolpatzen duen beisbol jokalari ttikia da.

            Poeta

                        Margoen usaina gauez jasan behar izaten duen

                        artistaren emaztea da.

            Poeta

                        Insomniotan mila monologo eraikitzen dituen

                        ameslaria da.

            Poeta

                        Iragana atzean lagatzeko tipula ebakitzen duen

                        sukaldari, ez hain sukaldaria da

Norbait hori zu zinela oroitzen dut.

Gogoan dut bai

eskuzapi xuria ematekotan hurreratu nintzaizula

eta deus erran barik hartu zenuela.

Ausaz emeki-emeki metatutako inpotentzia

edo edozein huskeria zen

zure malkoen zioa, arrazoia.

Izan zitekeen…

…zure poesia

Oihu egiten zenuen, garrasi

baina ez zen ezer entzuten,

ez zure malkoen hizkuntza ulertzen.

Ez nituen zure nota desafinatuak,

kortxete solteak,

konprenitu.

Potodun bertsoen muina aurkitzen ere

ez nintzen ahalegindu.

Klinex soil bat eskuratu nizun.

Negarrez zerraizun,

garrasi, oihu, txio

txilio

…

Eta zer moduz

ondo

ondo

ni ere txarto

Joseba Sarrionandia

(Isiltasuna,

irria,

hasperena)

Berandu, arras belu, beranduegi…

Oroitzen naiz zutaz,

Arduratzen zure poesiaz…

Ene aurrean joan zinen

 nonbaitetik inora

inor izatetik norbait izatera

Joan zinen.

Pauso bat

Bi urrats

Hirugarrena…

Adiorik ez

 Euriari so trenaren zain egotea atsegin zuen poeta anonimoari