Arbizuarrak AHT egitasmoaren kontra azaldu dira

Joan den igandean Abiadura Handiko Trenari (AHT) buruzko herri galdeketa egin zen Arbizun, AHT Gelditu! Elkarlanak antolatuta eta Arbizuko Udalak babestuta. Lizarragabengoan gertatu zen moduan iritzia eman zuten arbizuar gehienak ere AHT egitasmoaren kontra azaldu ziren. Elkarlanak emandako datuen arabera, 824 pertsonek osatzen dute errolda eta haietatik 397k (%48) parte hartu zuten galdeketan. AHTren aldeko bozak 6 izan ziren, kontrakoak 382 (%96,22) eta txuriak 9. Elkarlanak adierazi duenez, Errolda kontuan harturik ezezko boza eman dutenak hautesleen %46 dira.

Lizarragabengoan eta Arbizun egindako herri galdeketen balorazioa egiteko astelehenean prentsaurrekoa eman zuten Irantzu Berastegi eta Gorka Ovejero elkarlaneko kideak, Lizarragabengoako kontzeju buru Koldo Floresekin eta Arbizuko alkateorde Fran Baldarekin batera.



Elkarlanak
Irantzuk nabarmendu zuenez, “Arbizuko herriak gehiengo borobil batez ez esan dio AHT poriektu txikitzaileari”. Parte hartzea erroldaren erdira iritsi zela eta “Arbizuk nagusiki bere iritzia eman” duela azaldu zuen. Aldi berean, botere publikoei askatu zien “erabaki demokratiko hau errespeta” dezatela. Bestalde, galdeketan parte hartu zuten guztiak zoriondu zituzten, “haien iritzia eman dutelako eta herriari galdetzea zein garrantzitsua den erakutsi dutelako”. Tokiko bi erakundeendako ere esker oneko hitzak izan zituzten.

Larunbatean Nafarroako eta Espainiako Gobernuek sinatutako hitzarmena salatu zuten elkarlaneko kideek: “Informazioa ezkutatu, eztabaida ukatu eta propaganda besterik ez diote eskaini nafar jendarteari”. Elkarlaneko kideek “AHT proiektua gelditzeko borrokan indarrak bildu eta ekimenak zabaltzeko deia” egin zuten.

Tokiko erakundeek
Lizarragabengoako Kontzejuaren eta Arbizuko Udalaren izenean Koldo Floresek hartu zuen hitza. Azaldu zuenez, AHTrena “Garrantzi handiko gaia dela ikusi dugu gure herrietan eta herriari kontsultatu behar zitzaiola ikusi dugu”. Eta, berretsi zuen “lixerrengotarrek eta arbizuarrek erabakitzen zutena aintzat hartu eta errespetatuko” zutela, “hasieratik esan bezala”.

Koldok azpimarratu zuenez, “herriari eragiten dioten gauzen inguruan galdetzea eta erabakitakoa aurrera eramatea baino gauza demokratikoagorik ez dago”. Bestalde, kontzejuko buruak salaketa egin zuen: “Madrilgo zein Iruñeko gobernuek informaziorik helarazi ez digutelako eta eztabaidetan parte hartzeko gonbiteari isiltasun lotsagarriarekin erantzun diotelako”. Eta galdetu zuen: “zer demokrazia mota da hau herriari informazioa ukatu eta erabakitzeko eskubidea ezeztatzen diona?”

Ikuskatzaileak
Arbizuarrek igandean 9:00etatik 20:00etara iritzia emateko aukera izan zuten. Inongo gorabeherarik ez zela izanen ziurtatzeko hainbat begirale izan ziren: Arruazuko eta Olaztiko alkateak; LABeko eskualdeko arduraduna eta hainbat delegatu; Hesian, Kaotiko eta Vendetta taldeetako musikariak; Eneko Lazkoz bertsolaria; Arbizuko nesken sokatira taldeko kideak eta Bakaikuko Gazte Asanbladako kideak.

Textu eta argazkia, Guaixetik hartutak.