SCRIPTA VOLANT?

Verba volant scripta manent, dio latinezko esaldi zuhurrak: hitzak doatzila eta idatziak gelditzen... Idatzia galtzekotan dela gure mundu zibilizatuan, horra datu batzuek erakustera eman lezaketena! Ingalaterran eraman ikerketa batek erakusten du biztanleen %40k ez duela ezer irakurri iragan sei hilabetetan. Jakina da aspaldidanik irakurketa apaltzen ari dela, irudiak gaina hartzen duen arau mende erdi honetan hori nabaritzen da. Ez irakurtzeak ez idaztea ekartzen du berarekin. Internetekin eta telefonoarekin ere aldakuntza nagusia da: ia inork ez baitu gehiago idazten gutunik, fakturak ditugu gure gutunontzien betegailu gehienak... Horretaz tristatzen direnak ba omen dira. Erantzuna? Har papera eta idazluma zerbait, lagunarteko lokarri hazterik bada edonon!.

Honi eransten ahal dena da ere azken denbora hauetan eskoletan umeek zuten eginbide nagusia, idazten ikastea galtzekotan dela! AEBtako 50 estatuetatik 45etan ez da gehiago beharrezkoa eskuz idaztea, aski da ordenagailuz baliatzen ikastea, eta hori haurtzarotik! Eskuz idaztea eta makinaz egitea berdina al da? Bakoitzak erantzungo du, baina zerbait nagusi galtzen dela sumatzen ahal da.

Idaztea urrats nagusi bezala kontsideratzen da, hizkuntzaren asmakizunaren ondoko urratsa baita. Jakintza eta gogoetaren ardatz nagusi izan da 3.000 urte hauetan. Idaztea, gogoetaren lantzea ere bada, munduaren eta norberaren marraztea ere. Memoria elektronikoaren ezabagarritasun arazo larria dela edonon azpimarratzen delarik, eskuaren baliatzea ere galduko al da? Ez al da hori ere erresistentzi gune premiazko bat?