bi antzezlan asteburu honetan

Lapurzuloa' ostiral gauean, eta haurrentzako 'Ni ez naiz Txotxolo' igande eguerdian

Kanpingags konpainiak Lapurzulo komedia beltza eskainiko du ostiral gauean Aita Mari aretoan (22:00).

Sinopsiak dioenez, "Garratza eta atsegina da. Obsesioak jotako lau pertsonaiaren bizitzak gurutzatzen dira. Mota guztietako terapiak probatu dituzte: jateari uzteko, erretzeari uzteko, lapurtzeari uzteko... Eta arazo horiek burutik kendu ezinik dabiltza guztiak.
Halako batean, lapurreta erraza egiteko aukera agertzen zaie, eta terapia guztiak ahaztuta, anbizioak itsuturik, prest daude laurak lapurreta elkarrekin egiteko, horrek behin betiko erretiratuko dituelakoan. Dirua bai terapia ederra!
Lapurretako dirua, ordea, Mafiarena da. Mafiak bizkor harrapatzen ditu gure pertsonaiak eta lauretako baten heriotza eskatzen du. Horrek gogoeta egitera daramatza: zer galduko luke munduak bakoitzaren heriotzarekin? Hala une batez seriotasun-printzez betetzen da lapurzuloa; baina luze gabe umorezko haize-boladak amaiera samur eta dibertigarria ematen dio abenturari".

Kandido Uranga zumaiarra da antzezlaneko aktoreetako bat, Joseba Apaolaza, Asier Hormaza, Kontxu Odriozola, Ainhoa Garai, Ainhoa Aierbe, Itziar Ituño, Patxi Barco eta Asier Sotarekin batera.

Igande eguerdian, berriz, Ni ez naiz Txotxolo haurrentzako antzezlana aurkeztuko dute Olatz Beobide eta Xabier San Sebastian antzezleek. Bost eta hamar urte arteko umeei dago zuzendua Aizpea Goenegak idatzitako testua.