MAITAGARRI ERRADIKALAK GARA

---

---

• Berdin dio zure genero identitatea eta sexu aukera zeintzuk diren. Zaren moduan zara ongietorria Maitagarri Erradikalen taldean. Queer teorietatik asko edan dute Maitagarri Erradikalek azken urteetan. Hala ere, eta egiari zor, orain arte egon naizen topaketetan gizonak gustuko dituzten gizonak aurkitu ditut batez ere, eta hori adieraztea garrantzitsua dela iruditzen zait, bada ezpada.

• Topaketak irauten duten bitartean zure ohiko bizimodua eremu horretatik kanpo utz dezakezu. Nahi duzun izena aukera dezakezu bertan egongo zaren egunetarako. Txikikeria dirudi izenaren kontuak, baina badu bere arrazoia: gurasoengandik jaso dugun izenak uste baino gehiago balditza gaitzake. Eta Maitagarriek libre sentitu nahi dugu. Garen moduan izateko. Nahi dugun moduan bizitzeko. 

• Izenarekin ez ezik, gure itxurarekin jolastea ere maite dugu. Edozein ordutan. Edozein unetan. Ez harritu basoan paseo bat ematen ari zaren bitartean soineko luze - elegante bat eta takoiak daramatzan Maitagarri batekin topatuz gero, ala biluzik doan norbait ikusten baduzu. Ohikoa da Maitagarri Erradikalen mundu miragarrian. 

• Kantatzeko gogoz bazaude, kantatu ezazu. Meditazioa egin nahi izanez gero, lasai meditatu. Zure kezkak hitzez adierazteko beharra baduzu, lagunik ez zaizu faltako. Eta paseo bat bakarrik eta isilik eman nahi izanez gero, lekurik aproposenean zaude. Maitagarri Erradikalen munduan gure emozioak lasaitasunez bizitzeko baimena eman diezaiokegu gure buruari. 

• Maitagarriak persona aktiboak izateaz gain, ondo antolatu ohi gara. Goizero zirkulu handi bat osatu, eta bertan eguneko plana zehazten dugu: eginbeharrak, otorduen eta garbiketen txandak, eskainiko diren tailerrak, informazio praktikoa… Bestalde, malgutasun handia izaten dugu eta egun batean gauza handirik egiteko gogorik ez baduzu, hori ere ondo dago, atseden hartzera eta pilak kargatzera ere joaten garelako topaketa horietara. Baina harrigarria da ikustea zenbat gauza egiten dituzten Maitagarriek, bereziki talde lanean. 

• Bihotzen Zirkuluek berebiziko garrantzia dute guretzat. Eta zer dira Bihotzen Zirkuluak? Buruan ditugun pentsamenduak, kezkak eta emozioak hitzen bidez adierazteko espazioak dira. Pertsona batek hitz egiten duenean, zirkuluan dauden gainontzeko pertsonak entzuten ari dira. Ez dute ezer erantzuten, ezta aipamenik egiten ere. Ez dute entzundakoa epaitzen. Eta persona guztiek izaten dute hitz egiteko aukera zirkulu horretan. Gure barruak hustutzeko, gure sentimenduak partekatzeko, beste pertsonen jarrerak hobeto ulertzeko eta enpatia sortzeko tresna bikaina da Bihotzen Zirkulua. Gomendagarria benetan!

• Maitagarriek larrua jotzea maite dugu. Baina horrek ez du esan nahi amaierarik gabeko orgia batean bizi garenik. Bakoitzak gure intimitatea ulertzeko modua dugu, eta horregatik jarrera guztiak onartzen eta errespetatzen ditugu. Gure nahiak eta beharrak adierazteko eta, aldi berean, gure mugak ezartzeko leku seguruan gaude. Eta norberak bere burua hobeto ezagutzeko, garen moduan azaltzeko eta beldurrak eta desioak gainditzeko espazio aproposa eraiki ohi dugu. Taldean.

• Maitagarriek elkar zaintzen dugu. Arlo askotan: babesa eskainiz, besarkada bat ematen, denentzat janari goxoa prestatzen, masaje bat eskaintzen, entzuten, gure alderik hauskorrena erakusten… eta maitasun horrek ez du parekorik.

• Maitagarriei mordoa gustatzen zaigu ondo pasatzea. Nola? Mila modutara: kantatzen, dantzatzen, jolasten, lakuan bainu bat hartzen… bazkal osteko platerak garbitzea festa erraldoia izan daiteke norbaitek musika topera jartzen duenean. Eta tarteka antolatzen ditugun "Non Talent Show"ak mundialak izaten dira.