Indarrak bildu eta aldaketa eragin Unibertsitatean

Datorren otsailaren 16an Hauteskunde Sindikalak izango ditugu UPV/EHUko Administrazio eta Zerbitzuetako Pertsonalak eta  Irakasle / Ikerlari Pertsonalak, ordezkaritza eta negoziazio organoak berritzeko. LAB organo hauetan egotea oso garrantzitsua da, hala azken lau urteetan egindako lanarekin jarraitu ahal izateko, nola lan-erreformaren bidetik datozen inposaketak zein inposatutako soldata-murrizketak geldiarazteko.

Euskal Herrian guztiok duintasunez bizitzeko beste aberastasun sortzen da, enplegu egonkor eta segurua sortzeko beste, kalitatezko zerbitzu publikoak izateko beste eta guztiontzako babes soziala bermatzeko beste.

Eredu ekonomiko eta sozial berria behar dugu. Baina ezinbestekoak ditugun aldaketa sozial hauek erdiesteko erabakitzeko ahalmena eskuratu behar dugu. Erabakitzeko aukerarik gabe, heurek erabakitzen dute gure izenean, gu gabe eta gure kaltetan beti. Aldaketa politikoa premiazkoa dugu aldaketa sozial eta ekonomikoa lortzeko.

LAB-ek eskaintzen dizuna antolatzeko aukera da, gauzak aldatzeko helburuarekin indarrak biltzeko tresna. Ezagutzen gaituzu. Klase-sindikatua eta independentista gara, gure herriaren gehiengo soziala osatzen dugun langileen aldeko benetako aldaketarekin konprometitua dagoen sindikatua.
 
Hauek dira hurrengo lau urteetarako gure konpromisoak. Beraiek zehaztu ahal izatea martxan jartzeko hitzarmenetan LABen bitartez errealitate bilaka daitezen borrokatzearen alde gaudenok lortuko dugun indar eta babesaren baitan egongo da. Horretarako ezinbestekoa da indarrak biltzea beharrezko aldaketak gehiengo sozial langilearen alde bultzatzeko. UPV/EHUn ere. Horren alde zure laguntza izatea espero dugu.