Angkor

Gaur goizean normalean baino askoz lehenago jaiki behar izan dut pisuzko arrazoi batengatik. Angkorreko jauregia egusentian bisitatu nahi dugu. Antza denez izugarri erakargarria da tenplu nagusia bere atzetik eguzkia ateratzen den momentua.
Zonbi egoeran banago ere Angkorreko marabilaz gozatzeko prest nago. Gainera, eguraldi argitsua izango dugula esan digute, argazki ederrak ateratzeko ezinhobea.
Angkor aldera abiatu gara tuk-tukean, eta Angkor jauregian egin dugu lehenengo parada. Turistez beteta dago. Denak prest daude egusentiaren argazki onenak ateratzeko.
Ondoren, Bayon izeneko tenplura goaz, Hau ere oso polita da . Paretetan inkrustatuta dauzkan aurpegiak ezagunak egiten zaizkit. Nonbaiten ikusia daukat. Tom Raider bideo-jokuan uste dut.
Jarraitzen dugu tenploak ikusten etengabe. Batzuk besteak baina ikusgarriagoak, baina denak batera multzo arkitektoniko eder baten parte ordezkaezinak dira.
Bestalde, tenplo atarietan saltzaile nekaezinak daude. Umeak dira gehienak, eta hasieran astun xamarrak ematen duten arren haiekin bromeatzen eta hitz egitenez gero oso jatorrak gertatzen dira.