5 Blog interesgarri

Sarean bueltaka badakizue denetik aurkitzen dela. Ba ona hemen niri interesgarriak iruditzen zaizkidan 5 Blog ezberdinen lotura eta komentario laburtxo bat.

Pripublikarrak : Bilbon sorturiko talde feminista da. Blogean, ekitaldi kultural, lehiaketa, giza eskubideen aldeko borroka egitarauak eta bestelako ekintzen gaineko informazio anitz eta irekia aurki daiteke. Astero dago mugimenduan eta oso interesgarria izan liteke edozeinentzat, begiratu bakarrik ez dago.

Txapa Irratia: Orain dela 20 urte pasa, Bergarako gazte batzuk ekin zioten frekuentzi modularreko uhinak astintzeari. Hasieran eraikuntza baten lurpeko lokalean eta geroago Bergarako kartzela zaharra den gaur egungo Gaztetxean.

Irrati txikia, baina gogorra. Azkenik lortu dute beraien irratsaioak munduko edozein lekutaraino heldu haraztea. Eta ez hori bakarrik, Euskal Herriko beste zenbait irrati librerekin lotura estua bai dute, eta horrela haiek gure ordenagailutik entzuteko aukera ere eskaintzen dute beraien blogean.

HellDorado: Gasteizko kultur elkarte bat da. Edo hala deitzen diote bertakoek behintzat. Egia esan, Euskal Herrian dagoen kontzertu sala onenetariko bat da (nire ustez noski). Bertan antolatzen diren musika kontzertuak oso interesgarriak dira, eta estilo desberdinetako musika egoten da entzungai, naiz eta rokanrola den beraien plater fuertea. Edariak prezio egokia dute bertan, eta dekorazioa ikustekoa da. Giroa berriz, ezin hobea musika entzuten duzunean geldirik egon ezin den ohietakoa bazara.

Blogean, antolatzen dituzten ekitaldi guztien gaineko informazioa erraz kontsultatu daiteke, oso argi ageri bai da guztia.

Bernardo Atxaga: Bai, Bernardo Atxagak ere badu blog bat. Asko gustatu zait, bere idazkera gogoko dudalako, eta bertan bere zenbait idatzi irakurtzeko aukera ematen duelako. Gainera, nahi izanez gero,iritzi bat utzi eta berarekin hitzak partekatzea posible da, denok dakizuen bezala.

Espacio Abisal: 1996an, artista talde batek Bilboko kultur ekintzari oinarri eta leku egoki bat emateko asmoz, elkarte kultural hau sortu zuten. Ez zen irabazi ekonomikorik lortzeko asmoz egin, baizik eta artista independenteek babesleku bat izan zezaten.

Bilboko Hernani kalean topatuko duzue berau, baina lehenbizi beraien blogari begirada on bat botatzea gomendatzen dizuet. Oso interesgarria da, eta Abisalen aurrera eramaten diren kultur ekintza guztien gaineko informazioa aurki daiteke. Ia astero ekitaldiren bat ematen da eta beraz, gaiaren gainean informatuak egotea nahi baduzue, begia gainetik ez kentzeko esango nizueke.