Euskararen Nazioarteko Egunaren ospakizuna Ordizian

Giro ezin hobean ospatu genuen iragan ostiralean Euskararen Nazioarteko Eguna­. Efemeridea asteazkenean zen arren, ostiralean egin genituen ospakizunak. Eta ederki asmatu genuen gainera. Hotza ez zen oztopo izan Larrun Arri elkartearekin adostutako egitaraua fin-fin betetzeko.

Arratsaldeko bostetan jarri zen danbolina martxan; 50 kilo gaztaina zakuan eta arratsalde osoa festarako. Eguraldia lagun izan genuen; aurreko egunetako erauntsia baretuta tenperaturak ere behera egin zuen aste bukaerarako. Gaztaina errearen usainak seietan ingurarazi zituen lehen lagun multzoak. Ilunabarreko freskotasuna arinagoa zen danbolinari zerion sugarraren alboan; halaxe ulertu genuen geuk ere.

Gaztaina jana eta musika izan genituen errepertorioan. Larrun Arri elkarteko abesbatzak zazpietan hasi zuen emanaldia Mikel Laboari omenaldi xumea eginda. Abesbatzak Txoriak-Txori kantatu zuen plazan, herriko tabernetatik kantu-jira hasi aurretik.

Oso animoso aritu ziren kantari Larrun Arrikoak herriko kaleak eta bazterrak astinduz. Emanaldia amaitzeko, plazara inguratu ziren berriz Mikel Laboaren omenez azken kanta abesteko.

Festa hamarrak ingurura arte luzatu zen. Danbolinaren sua itzali ahala, freskotasuna hotz bihurtu zen plazan eta honenbestez amaiera eman genion arratsalde oparoari. Datorren urteko Euskararen Nazioarteko Eguna itxaron gabe, euskararen egunak egunero izan behar duela gogoratuz.