Arrigorriagako gazte asanblada

Arrigorriagako gazte asanblada

Arrigorriagako gazteek, herriko kuartel zaharra okupatu zuten. Okupazio batek dakarren urduritasun, ilusio eta determinazio sentimenduz beterik ziurrenik. Okupazioaren abiapuntua argia zen:

Udalak, PNV-ko Alberto Ruiz de Azua-ren gidaritzapean, gazte-gune barneko gelatxo bat eskaini zigun. Garen guztiontzako txikia izateaz gain, baldintza batzuk jarri zizkiguten: lokaltxo hau ezin zen manipulatu, alegia, ezin ziren barnean tabikazioak egin, ezin zen barrarik jarri, ezin genuen gure gustura apaindu..., udaletxekoek, kultur etxekoek, eta abarrek bertako giltzak izango zituzten, nahi zutenean "behar besteko" inspekzioak egiteko...

Baldintza hauek ezin ziren ulertu guk planteatzen genien proiektuaren barnean, eta nahiz eta gu arrazoitzen saiatu, ez zuten inongo ekarpenik onartu, behin eta berriz ezezko harroputzak ematen zizkigutelarik. Negoziaketa hauek etetea erabaki genuen, aurretik esan geniena berraipatuz: Zuengandik ez dugu lokal duinik jaso,beraz, okupazioa da daukagun alternatiba bakarra.

Hitzetatik ekintzetara esango genuke euskaldunok. Eta halaxe egin zuten Arrigorriagako gazteek. Herriko kuartel zaharrera abiatu eta bertan sartu ziren behar duten gaztetxea gorputzeko asmoz. Udalak ordea parke bat eraiki nahi omen du bertan. Gazteek honen aurrean ere mezu garbia luzatu dute:

Herri hontako gazteriak esana: Hemen ez da parkerik egongo, behintzat guk arazo honekin jarraitzen dugun bitartean. Hortaz, gaurtik aurrera, gune askatu eta hemendik aurrera aske hau, herriaren esku jartzen dugu, gazteriak eta herriak benetan dituen arazoei heldu eta aurre egiteko.

Desalojoa ordea astelehenean heldu zen jendarte honen ongizatearen izenean legea betearazteko konpromiso irmoa hartu duten txapelgorri eta udaltzaingoen eskutik. Hasieran mazo batekin saiatu ziren atea behera botatzen, azkenean motozerrarekin amaitu zuten. 8 gazte identifikatu zituzten. Desalojoaren aurretik gazteek beste behin ere argi hitz egin zuten: botatzen bagaituzte, jotzen bagaituzte, isunak jartzen badizkigute, epaituak bagara... zu, Alberto Ruiz de Azua, zu izango zara erantzule eta errudun bakarra.

Halaxe, "erantzule eta errudunarengana" jo zuten gazteek udaletxera. Alberto Ruiz de Azua alkatea ordea ez omen zegoen bertan, eta inork ez zekien noiz iritsiko zen. Gainera telefonoa ere ez omen zuen hartzen. Eta halako erantzunen atzean askotan ezkutatzen den egiarekin egin zuten topo gazteek: hain ausartak diren politikari eta kargu garrantzitsuak dituzten pertsona hauek, biziki lanpetuta bizi direnak noski, ez dakite aurpegia ematen eman behar dutenean. Izan ere alkate jauna Zaratamoko (alboko herriko) kafetegi batean egon omen zen luzez kafea hartzen.