Finala erabakita

---

Arabako bertsolari txapelketak baditu finalistak

 

Oihane Pereak lortu du finalerako zuzeneko txartela eta Manex Agirrerekin batera Iñaki Viñaspre, Rikardo Gonzalez de Durana, Juan Mari Juaristik eta Asier Otamendik izango dute aukera txapela lortzeko.

 

 

 

Arabako bertsolari txapelketan finalean kantatuko duten bertsolariak zeintzuk ziren jakin asmoz, jende andana bildu zen Aramaioko kultur etxean jokatutako finalerdira. Idoia Beitiaren esanetara Oihane Perea, Ruben Sanchez, Zigor Enbeita, Asier Otamendi, Andere Arriolabengoa eta Xabi Igoa izan ziren kantuan. Saioa polita eta bizia izan zen, Enbeitak agurrean jakinarazi bezala “dena ematera baino denei eman asmotan” taularatu baiziren bertsolariak.. Xabi Igoarentzako lehenengo txapelketa izan arren, estreno ederra egin zuen aramaioarrak. Oihane Perea dotore eta eroso ibili zen, eta egindako lanak finalean kantatzeko zuzeneko txartela eskuratzea ahalbidetu zion. Asier, Ruben eta Zigorrek ere taula gainean defendatzen badakitela erakutsi zuten. Andererekin batera Xabik jaso zuen txalorik gehien, beraien herrian kantatzerakoan 170 lagun hurbildu baitziren bertsolariei babesa eskaintzera.

 

 

Idoia Beitiak kartzelara bidali aurretik egin beharreko lana ofizioka zortziko handian, zortziko txikian eta hamarreko txikian hiruna bertso izan zen. Horren ondoren, bakarka, bi puntu erantzun eta gaiari bi bertso bota behar izan zizkieten.

 

Saioa arratsaldeko bostetan hasi zen. Agurren ondotik  Oihaneri, Rubenen taberna gainean bizi zela eta, asteburuko zarataz kexu  epaiketa ekiditeko ahaleginetan Rubenekin  bildu zela adierazi zioten. Saioko txapelduna alternatibak proposatzen ibili zitzaion Sanchezi. Lehenengo bertsoan ” Seguru nago Ruben zarela langilea eta noblea/akordio bat behar dugu hemen, ipini kafe doblea!” bota zion. Rubenek sendo eutsi zion bere lanbideari eta ofizio polita osatu zuten biek. Zigorrek denbora luze batean hona ez etortzeko kantatu zion kartzelariaren azaletik kaleratzeko puntuan aterantz zioan Asierri. Otamendik kanpoan nola bizi behar den ahaztu zaiola eta laster bueltatuko zela agian erantzun zion eta honen atzetik konforme azaldu zen “hemen behintzat dohainik ditut jana eta teilatua”adieraziz.  Andere eta Xabi bikote gazte bat izan ziren, lehenak umea eduki nahi zuen eta Xabik aldiz, ez. Gaztetasuna eta diru faltari gogor egin zioten aurre aramaioarrek. Igoak itxarotea nahiago zuenez, beraientzako denborarik ez zutela eukiko umea izatekotan kantatu zion.Anderek beti bere gorputza gaztea ez dela izango eta, maitasuna baldin badago besterik ez zuela behar erantzun zion. 

 

Zortziko txikian saioak gora egin zuen. Algara eta txalo artean, Ruben Sanchez eta Zigor Enbeita ezkontzekotan zirela eta altarean apaizaren zain zeudela esan zien gaijartzaileak. Rubenek “halere arraroa bi gizonen boda/igual apaiza ere gaya izango da” esanaz ekin zion ofizioari. Enbeitak agian tabernan egongo dela boda digeritzen kantatu zion eta hona Sanchezen erantzuna.

 

Bada ez da normala ni

Garaiz joatea

Familia ere hor dago

Eta ze pakea

Nahiz ta onartu duten

Gaya izatea

Jasango ote dute

Musu ematea?

 

Otamendi eta Arriolabengoaren atzetik, paperean eta adinean bete betean sartzea lortu zuten Perea eta Igoak. 17 urteko bi mutil gazte ziren eta parrandatik bueltan putetxe baten ate aurretik gogoz kantatu zuten. Oihanek estrenoa mundiala XABI izango zelakoan honakoa erantzun zion Xabiri: 

 

Kartera erre dugu

Ekin eta ekin

Pagari atera nahian

Hainbeste etekin

Baina zalantza bat dut

Ta nahi nuke jakin

Zer egingo diguten

Hamar eurorekin!

 

 

Xabi Igoa fresko eta fin aritu zen, bere lehen txapelketa izanik  ere.  Andere eta Asierrek ere txukun osatu zuten zortziko txikiko saioa eta Hamarreko txikiko ariketaren ostean aurkezleak bertsolariak kartzelara bidali zituen. Ruben Sanchez eta Andere Arriolabengoak itxaropenaren telefonoan izan zuten elkarrizketa nabarmentzekoa izan zen, baita Zigor Enbeita eta Oihane Perearen  euskarazko mintza praktika ere. Xabi Igoak eta Asier Otamendi irakasle eta ikasle paperean jarri zituzten. Ateraldi politak izan zituzten biek eta entzuleak barreka gogotik txalotu zituen bi bertsolariak.

 

Bakarkakoan denak fin aritu baziren ere, Oihane Perea eta Asier otamendiren saioa nabarmendu ziren. Gaiak “egitegiari Xak egiten ari zara, gero eta gutxiago falta da egun hori heltzeko” zioen. Otamendik minbizia duenaren azaletik kirofanora zioala eta triste eta etsita zegoela esanez honela bukatu zuen bere lan  puntuagarria: “ urte hontako egutegia daukat gurutzez josita/baina bazpare hurrengokoa ere daukat erosita”. Zigor eta Rubenek presoak izan zituzten gogoan, eta Igoak txapelketari kantatu zion. Hala ere,  Disdira gehien  atera ziona bakarkakoari  Oihaneren bakarkoa izan zen:

 

Hirurogehitabat urte dauzkat

Izan dut bizi eztia

Izan naiz oso langile fina

Ta batzutan amestia

Jubilazioa helduko da

Aibarruko abestia

Udaberria hori izango da

Irtengo da eguzkia

Eta orduan eukiko ditut

Denbora eta astia

Eta bueltatu beharko didate

Pagatutako guztia

 

Berrogehi uret luzetan nola

Xahutu dudan denbora

Lan kutre txar bat lortu nahi eta

Pasa behar mila froga

Niretzat hauxe ez da izango

Galbidea inondik inora

Manifetara joaten hasiko

Naiz eta zeinen gustora

Joango naizen harri batekin

Poliziaren ondora

Eta orduan nire bigarren

Gaztaroa hasiko da

 

 

Sei bertsolariek egindako lana puntutan ordaindu zien epaileak, Oihane Pereari finalean kantatzeko zuzeneko txartela eskainiz 333,5 punturekin eta hurrenez hurren Asier Otamendiri 330,5 puntu emanaz Andere Arriolabengoa, Ruben Sanchez eta Zigor Enbeitari 306,5 puntu eta azkenik Xabi Igoari 283,5 puntu

 

Hortaz, Apirilaren 4an Gasteizko Printzipal Antzokian kantatuko duten sei bertsolariak Oihane Perea eta Manex Agirre (zuzenean sailkatuak),  Asier Otamendi, Rikardo Gonzalez de Durana, Juan Mari Juaristi eta Iñaki Viñaspre izango dira. Sarrerak gaurtik aurrera Gasteizko Amaia Zentroan izango dira eskura edo martxoaren 31tik aurrera Printzipalean bertan. Honenbestez sustraiak errotu egin dira. Orain, nor iritsiko den puntara jakitea baino ez da falta. Sei buru eta txapela bakarra dagoen tokian hau baino ez da ziurra: irabazi nahi duenak gogor borrokatu beharko du.