13. urtebetetzea, earra!
Hemen Aramaioko bertso eskolakoek egindako balorazioa:
"Asteburu honetan ospatu dugu gure bertso eskolaren 13. urteurrena. Ostiralean arratsaldeko 19:00etan lehen zuziri batek hasi zuen urteurrenaren ospakizuna. Ondoren, 22:30ean kultur etxea bete bete egin zen. Bertan, Josu Goikoetxea gai-jartzaileak eta Maialen Lujanbio, Igor Elortza, Jon Maia eta Unai Iturriaga bertsolariek Santa Kruz Abadea Aramaion bertso-trama ederra eskaini ziguten. Larunbatean ere, arratsaldeko 18:00etan jende dezente elkartu ginen herriko pilotari eta bertsolariak ikusten, Iker Agirre eta Jokin Balanzategi, Manex Agirre bertsolari-botilero zutela, Iker Saizar eta Unai Etxebarriaren kontra, Andere Arriolabengoa bertsolari-botillero zutela, aritu ziren 22ra. Azken bikote honek irabazi zuen ozta-ozta giro eta umorez jokatutako partidua. Eta urteurren hau itxi zuen azken ekintza Bertso-Gala-Afaria Iturrietako Sagardotegian izan zen. Bertan, afaldu ostean, Oihane Perea eta Xabier Agirreri omenaldi txiki bat egin genien, bertso eskolaren sorreran eta bilakaeran izan duten garrantziagatik. Ondoren bertsoa eta barrea izan ziren nagusi, bat-batean batzuk eta bertso espektakulu prestatu batekin beste batzuk, baina bertan bildutako ehun pertsonek oso ondo pasatu genuen. Orain, urteurrena borobiltzeko, bertso eskolatik egiteko gelditzen zaigun azken kontua eskerrak ematea da, eskerrik asko 13 urte hauetan zehar bertan ikasle, irakasle, laguntzaile, babesle, . . . izan diren guztiei, eta eskerrik asko, nola ez, gure bertso eskolako ekintzetan parte hartu, hartzen eta hartuko duzuen lagun eta bertsozale guztiei".
Iruzkinak
Utzi iruzkina: