IRLANDAR EGUNAK

Bi irlandar egun ospatu ditu dagoenekoz Gazte Asanbladak, eta agerikoa izan da herrian oso harrera ona izan duela. Lehena 2008ko ekainean ospatu zen, eta bigarrena 2009ko irailean. Beste inon egiten ez den egun hau antolatzearen arrazoiak garbiak dira, eta egun hartan kaleratu genuen agirian islatzen genituen argudio horiek:

            GOGA-k Ormaizti eta Gabiriako herriari:

Hamaika herri gaude zapalduta, hamaika herri gaude matxinatuta; eta hainbeste amorru eta iraultza gure herriak berdin edo gehiago maitatzetik soilik etor daiteke.

            Irlandako gatazka beti sentitu dugu gertutasun handiz, bizi ditugun ezberdintasun anitzak ez baitira nahikoak berdintasunak estaltzeko. Ez al dauzkagu etsai berdinak, ingelesak, frantziarrak edo espainiarrak? Eta gure etxekoak? Azken finean, sistema kapitalista, neoliberala, inperialista!, ez da zu eta ni, baizik eta zu edo ni.

            Ez gaituzte izaten utzi, garen arren; gure lurra euren patriketan sartu dute; haientzako ez gara gizakiak, giza baliabideak baizik. Hainbeste malko eta odol isuri ostean zerbait argi geratu bazaigu, zuekin etorkizunik ez daukagula da. Herri txikiok gure geroa bermatzeko dugun tresna garrantzitsuenetakoa da elkartasun internazionalista.

            Badaukagu irlandarrengatik zer ikasi, eta bertan gatazkak eraman duen ibilbidea aztergai izan behar dugu; hitza eta erabakiaren bidez arazoei irtenbidea aurkitu daitekeela erakutsi digute, baina horiek dira zehazki estatu espainiar eta frantziarrak euskaldunoi urratzen dizkiguten eskubideak.

Herritar guztiei dei egiten dizuegu ekimen berri eta aberasgarri honekin bat egiteko, gure herriei beste bizitasun bat ematea guztion esku baitago; salaketa eta festa baturik dauden egun honetan eman diezaiogun gure herriari beste kolore bat.

Irlandan errepublika batu eta librea sortzea dute hizpide; gu Euskal Herria independente eta askea eraikitzera goaz. Utopiak omen dira, baina utopia biharko egia besterik ez da; bi pauso eman eta bera beste bi aldentzen da, baina azken finean horretarako balio du, pausoak eman eta ibiltzeko. Ez diegu gure ametsei uko egingo, guztiz kontrakoa, besteek gurekin amets dezaten nahi dugu.

Denok ala inor ez, dena ala ezer ez.

TIOCFAIDH ÁR LÁ!

JO TA KE!

            Bi egun horietan egitarau politak antolatu ziren: irlandar gazte baten hitzaldia, bertako musika eta garagardoak, bakarrizketak…

            Irlandar eguna antolatzeak Ross bezalako pertsonaia ezagutzeko aukera eman zigun, eta horrek gainera Irlandara bidai bat egiteko aukera izan zuen ondorio. Beharbada beste irlandar egun bat antolatuko da aurten, baina egitekotan, azkena izango litzateke; ondoren nazioz aldatuko genuke.

            Zein izango ote da aurten edo hurrengo urtean Ormaiztia eta Gabiria ekarriko dugun munduko txokoa?