Nafarroako 123 hautetsi independente Gernikako Akordiora bildu dira

2010eko irailaren 25ean Gernikan Eusko Alkartasunak, ezker abertzaleak, Alternatibak, Aralarrek, Abertzaleen Batasunak, sei sindikatuk eta hainbat gizarte eragilek sinatutako akordioa jasotzen ari den atxikimenduek ez dute etenik. Nafarroako 123 hautetsik egin zuten bat, atzo, akordioarekin, eta itunak jasotzen dituen edukietara lotzeko deia egin zieten Nafarroako herritarrei.

37 hautagaitza independenteetakoak dira itunari babesa jendaurrean eman berri diotenak. Gernikako Akordioaren balioa aintzat hartu, eta indartzeko borondatea adierazi dute: «Hautagai zerrenda independenteok ez dugu ahalegin horren bazterrean geratu nahi», adierazi dute, akordioak indarrak batzeko erakusten duen borondateak gatazka konpontze bidean jartzen laguntzen duelakoan. «Gure partea jarri nahi dugu sinatzaileek martxan jarri duten ekimenean».

Gernikako Akordioari atxikimendua adierazi dieten 123 hautetsietatik 21 alkateak dira, eta gainontzekoak, zinegotziak. Hiru alkatek irakurri zuten atzo guztien artean adostutako manifestua: Javier Erro Etxaurikoak, Juan Miguel Zudaire Metautenekoak eta Patxiku Irisarri Etxalarkoak.

«Nafarroa, Euskal Herria, aldaketa politikorako garaiak bizitzen ari da», diote hautetsi independenteek. «Herritarrek itxaropen eta ilusioarekin begiratzen diete azken urteko mugimendu politikoei». Euskal Herria «bake eta demokraziaren bidean dagoen ziurtasuna» da itxaropen horren arrazoia, hautetsi nafarren ustez, eta Gernikako Akordioan adierazitako borondatea dago horren oinarrian.

Eskerrak eman dizkie, hargatik, akordioaren sinatzaileei; «Euskal Herriaren alde horren lanabes erabilgarria jartzeagatik». Bide horretan sakontzeko eskatu diete, gainera, eta horretarako babesa eskaini.

Itunaren puntu «guzti-guztiak» bere egin dituzte, beraz. «Sinatzaileek bezala, ETAri bake konpromisoaren alde pausoak ematen jarrai dezala eskatzen diogu», esan dute. «Sinatzaileek bezala, estatuei ere bake bidean pausoak ematen has daitezela eskatzen diegu». Izan ere, hautetsi independenteen ustez, «bada garaia errepresioa albo batera uzteko eta bakean oinarritutako geroa eraikitzen hasteko».

Nafarroako herritarrei ere mintzatu zaie, bide horretara gehi daitezela eskatzeko: «Gure auzokideei zein nafar jendarteari eskatu nahi diegu dagoeneko martxan dagoen bake eta demokraziaren aldeko olatuari gehitzeko, egunez egun handiagoa izan dadin».

Halaber, Nafarroako gainontzeko hautetsi independenteengana ere jo dute, ekimenarekin bat egin eta euren atxikimendua eman dezaten proposatuz.

Gernikako Akordioari babesa erakutsi diotenek, bestalde, haien hautesle zerrenden izenean zein euren herrien izenean bidea indartzeko lan egingo dutela hitzeman dute, «gure indarrarekin gure herritarrak ere bide horretan inplika daitezen».

Konpromisoa betetzeko lehen urratsa zein den ere erabaki dute babesleek: atzo plazaratutako akordioa nork bere herriko gutunontzietan zabalduko du.