Euskal presoen kolektiboak bat egin du Gernikako Akordioarekin

Euskal Preso Politikoen Kolektiboak (EPPK) Gernikako Akordioarekin bat egitea erabaki du, “eszenatoki demokratikoa gauzatze bidean erreferentzia” dela uste baitu. BERRIAk bihar kaleratuko duen agirian, EPPK-k dio Gernikako itunaren edukien arabera jokatuko duela aurrerantzean: “Gatibu gauzkaten estatuek inposatzen dizkiguten muga eta traba guztien gainetik, EPPK-k, Gernikako Akordioaren baitan eta Gernikako Akordioaren edukiaren arabera, prozesu demokratikoan aurrera bultzatzeko konpromiso irmoa azaltzen du”. Izan ere, EPPKren iritzian, “gatazkari behin betiko konponbide integrala emateko” erreferentzia da akordioa, sortu zen unetik.

Euskal presoek prozesuan parte hartu behar duela azpimarratu dute kolektiboko kideek. “Umiltasun osoz baina erabateko konbentzimenduaz diogu hau: Gure herriak pairatzen duen gatazkaren konponbidea bera irudikatu eta lortu ahal izateko saihestezineko eragiletzat dugu gure burua”.

Igandean urtebete akordioak

Datorren igandean —irailak 25— beteko da urtebete Euskal Herriko hainbat eragile politiko, sindikal eta sozialek Gernikako Akordioa sinatu zutela. Gernikan bertan ekitaldia egingo dute igande eguerdian, eta han gauzatuko da EPPK-k itunarekin bat-egitea.