Etorkinak eta euskara

Sustapen batzordeak antolatu zuen eta Sagrario Aleman euskaltzain eta antolatzailearen hitzetan "etorkinekin lanean ari diren edota honetan adituak diren pertsonak ekarri ditugu, eta horien bitartez ikusiko dugu Euskal Herrian gizartea nola aldatu den, eta orain bizi dugun eleaniztasunak nola eragin dezakeen hizkuntza nagusiaren eta gutxituaren arteko harreman gatazkatsu horretan".

Kronika txiki honetan saio bakoitzeko edukia laburbiltzen saiatuko gara, hizlariak aritu ziren ordena berean.

Erramun Osak, Xabier Aierdi eta bien izenean hitz egin zuen, immigrazio berriak hizkuntza arazo berririk ba ote dakarren galderari erantzun nahian. Argi dago Euskal Herriko demografian aldaketa gertatu dela azken hamar urteetan, 200.000 mila etorkin iritsi baitira (gaur egun biztanleen % 7,2 dira). Haietako %45 latinoamerikarrak dira, %29 europar batasunekoak eta %13 magrebiarrak. Beraz, gehienak gaztelaniadunak dira eta %34,7 eskolatzeko adinetik gorakoak. Etorkinek, gainera, bizitza sozialeko egitura arruntetan euskararekin topo egiteko zailtasun objektiboak dituzte, immigrazio handia dagoen tokietan euskaldun gutxi daudelako (Bilbo, Erribera...) eta alderantziz (Gipuzkoako herri txikiak). Egoera honetan lan nekeza da etorkinei eskatzea gu egiteko prest ez gaudena egitea, euskara beharrezko ez den eremuetan euskara ikastea, edo ezagutzatik erabilerara jauzi egitea, adibidez. Osak dio hausnarketa orokorra egiteko garaia dela, eta euskalgintzak mezu apokaliptikoak jaurtitzeari utzi eta oinarri teorikoa berrikusi behar duela, ezinbestekoa euskara erakargarri bihurtzea.