Elkartasun bertsoek Gernika-Lumo hartuko dute domekan

Etxeratek antolatuta, elkartasun bertsoak Gernika-Lumora helduko dira berriro ere, domekan. Etxean nahi ditugu lemapean, euskal presoen, iheslarien eta deportatuen aldeko bertso saioa hartuko du Jai Alaik, 18:00etatik aurrera. Iaz ere antolatu zuten bertso saio hori, eta arrakastatsua izan zen.

Aurten ere Bizkaiko zortzi bertsolari handi igoko dira taula gainera. Xabier Goikoetxea gai jartzailearen gidaritzapean, Iratxe Ibarra, Etxahun Lekue, Miren Amuriza, Unai Iturriaga, Fredi Paia, Onintza Enbeita, Oihana Bartra eta Arkaitz Estiballes ariko dira bertsotan. Domekako saioan, gainera, Xabier Amurizak egingo du hasierako agurra.

Bertso saiorako txartela aldez aurretik erosteko, zenbait salmenta gune zehaztu dituzte antolatzaileek. Gernika-Lumon, esaterako, Auzokoa eta Arrano tabernetan jarri dituzte salgai txartelak. Bestalde, Markina-Xemeinen (Txokoan), Bilbon (Erronda kaleko Herriko taberna) eta Durangon (Plateruenan) ere erosi ditzakete sarrerak interesatuek.

Txartelak aldez aurretik erosteko aukerarik ez dutenek, hala ere, bertso saioagaz gozatzeko aukera izango dute. Izan ere, domekan bertan ere salgai jarriko dituzte sarrerak.