Otsailak 3 – Gero ta gozoago

Sanblas egunerako, ezin hobeki datorrena. Ebakuntzaren bezperan gaude, ta gaur bizio pixkat onartu dugu etxeko partean. Opilak ta goxokiak gora ta behera ta arratsean FIFA playstationean. Abdouk badaki ospitalera joateko bezperan dagoela ta ez du aukera galdu gutaz aprobetxatzeko!!!!

Baina gozotasuna ez dator bakarrik ahora, belarrietara ta begietara ere sartu da. Azken egunetan gero ta jatorrago dago etxean. Bromak etengabe egiten ditu, ziriren bat sartu digu ere, nabaritzen da gustura dagoela ta konfidantza hartzen ari dela.

Arratsean Beñat eta biok Reyesekin egon gara irratian, gure istoriaz solasean. Polita atera da saioa, Beñat bikain aritu da. Ederra da konpartitzea, ta beste batzuk guretzat inspirazio iturri diren bezala, agian guk ere gure aletxoa ereiten ari gara nonbait.