AHTa eta desjabetzeak Tolosako Elkarlanaren azken hitzaldia.

AHT eta DESJABETZAK Ostegunekoa, Tolosaldeako AHTren aurkako taldeak antolaturiko hitzaldien hirugarren saioari indarrez ekin zioten, EHNE sindikatuko lehendakari den Enekok, EHNEko abokatu Onintzak, AHT Gelditu! Elkarlanako Milak eta AHTa egingo balitz desjabetua izango litzatekeen Agurtzanek.

      

Proiektu erraldoi honek nekazal lur izugarria jango duela denok dakigu; baina zer gertatuko da desjabetuak izatera derrigortuko dituztenekin? Agintariek burugabekeri hau “interes sozial edo orokorrekoa” dela erabaki dutenez (“beren interes ekonomikoa” besterik ez dela argi eta garbi utzi badute ere), desjabetuek euren eskubide arruntak galdu eta, lege aldetik behintzat, ezer gutxi dute egiteko.

Hala ere, txikizioak jango duen lur guztia eta desjabetuak izango liratekeen jende kopuru altua ikusirik, informatuz, lagunduz eta elkarri babesa emanez, gauzak aldatu ditzakegula ikus dezakegu. Onintzak, EHNEko abokatuak, desjabetzeen prozesua esplikatu zigun; batez ere desjabetuak izango direnen oinarrizko eskubideak jakin eta legea betearazteak duen garrantziaz hitz egin zigun. AHTaren inguruko prozesuak, batez ere Eusko Jaurlaritzak egin dituenak, orain arte ez dira batere gardenak izan, eta are gutxiago legalak.

Beraz, desjabetuak izango direnentzat oso garrantzitsua da beren eskubideak zeintzuk diren jakitea, eta ez dezatela pentsa gai horretan beren udalen edo instituzioen babesa jasoko dutenik. Horrexegatik, AHTa egingo balitz desjabetua izango litzatekeen Agurtzanek AHTaren aurka aritu direnek emandako informazioa eskertzeaz gain, desjabetuak elkar ezagutu, hitz egin eta antolatzeko duten beharra nabarmendu du, elkarri lagundu eta babesteko.

Osteguneko hitzaldian, gainera, zarata, eremu elektromagnetikoa eta uraren gaiak ere aipatu ziren. Desjabetua ez izateak ez du esan nahi kalte zuzenik jasoko ez dugunik. Baliteke AHTa nire lurretatik ez pasatzea, baina etxe paretik pasa eta dezibelio altuek bertan bizitzea ezinezko egin dezake. Edo urak idortu eta kutsatzerakoan baratze eta abereen etorkizuna baldintzatzea. Uraz ari garenean ez baitugu edateko ura bakarrik kontutan hartu behar...

Baina “bigarren mailako kalte” horiek ez dituzte kontuan hartzen, eta ez dituzte hartuko. Dirudienez, oraingoan ere, herritarroi dagokigu aurreikuspen horiek egin eta salatzea. Desjabetuak izan daitezkeen pertsonei mezu garbia helarazi zitzaien: desjabetuek oinarrizko eskubide batzuk dauzkate eta informatuz, bilduz eta elkarri lagundu eta babestuz beren eta guztion egoera alda daiteke.

Denon artean AHTa gelditu baitaiteke! Tolosan astelehenero biltzen dira AHT Gelditu! Elkarlanekoak eta Goierrikoak asteartero, 19.00etan, Ordiziako Barrena Kultur Etxean. Informazioa nahi baduzu, animatu eta azaldu!
Edo gure posta elektronikoa erabili dezakezu:

goierrikoahtez "a bildua" gmail puntu com