Lasa ta Zabalaren bahiketa, tortura eta erailketaren 25garren urteurrena
Hogeita bost urte dira jada, Baionako karriketan GAL erakunde paramilitarrak bahitu zituztela.
 |
Baiona Ttipian bahiketa
Urriaren 15 eta 16 arteko gauean bahituak izan ziren bi errefuxiatu tolosarrak. Larunbata zen, eta Iparraldeko euskal errefuxiatu politiko asko bezela, bisita zuten. Tolosako famili eta gurasoak bisitatzera joanak ziren Baiona Ttipiko karriketara. Bisita eta gero, Lasa eta Zabalak Ikastolen aldeko jai batera zioazela esan, eta autoa hartzera joan ziren. Baina aparkalekuan, autoaren atea irekitzean, bahituak izan ziren Espainaiako poliziaren eskutik.
Hamabi urtez ezer jakin gabe
Bahiketa izan eta hiru hilabetera, 1984ko urtarrilaren 20an, Alikanteko (Herrialde Katalanak) Cadena Ser irratira deitu eta Lasa eta Zabalaren erailketa errebindikatu zuen GALek. GALeko kideak Busot herrian erail zituztela esan bazuen ere, Espainiako komunikabideetan ez zuen isladarik izan.
Gerora, Busot herrian ehiztari batek aurkitu zituen kare bizian zeuden lurperatutako gorpuak. Bi gorpuek zauriez gain, ahoak eta besoak lotuak zituztela ikusi zitekeen. Gainera, bien buruetan bala zuloak agertu ziren.
Baina bertako poliziek ez zuten lotu nahi izan Lasa eta Zabalaren kasuarekin. 100 kiloko kareak ez zuena desagertu, polizi eta gobernu buruek izkutatu zuten.
PP alderdi politikoaren eskutik etorri zen albistea
PSOE Gobernutik kendu nahi zuen PPk Aznar buru zuela. Hauteskunde kanpainan behin eta berriz, Gerra Zikina erabili zuela leporatzen zioten PSOE alderdiari.
12 urte eta gero, Lasa eta Zabalaren gorpuak Busoteko kasuarekin lotu ziren. Isilpean ADN frogak egin zizkieten, eta Busoteko herrian aurkitutako gorpuak Lasa eta Zabalarenak zirela baieztatu zuten.
Komunikabideetatik, biak gogorki torturatuak izan zirela jakin izan zen.
Polizia espainola, Guardia Zibila eta Ertzaintza elkarlanean
Epaile batek, edozein omenaldi galarazi eta lehen bait lehen gorpuak Tolosan lurperatzeko agindua eman zuen. Agindu eta egin, kolore guztietako poliziek bi gorpuak zeuden feretroak bahitu eta Tolosarako bideari ekin zioten.
Euskal Herritik 800 Km-tara zeuden gorpuak, 1995ko ekainaren 21ean iritsi ziren Hondarribiko aireportura. Han hurbildu ziren famili, lagun eta herritarren kontra bortizki oldartu ziren lehendabizi. Ondoren, Tolosako hilerrian kargatu zuen polizia autonomikoak, jende asko jipoituz.