The long road // Itxaro Borda // Maiatz // 2005.eko ekaina
THE LONG ROAD
Bidea hartzen dudan aldiro
Ametsak nau eramaten
Muga ilunen haraindiraino
Hatsa didala ematen.
Pasatu ditut ordu luzeak
Eta ehun milaka gau
Hautsi direla ene usteak
Bideak haragitzen nau.
Kahaken begi sotil mutuek
Ilargi baten dirdira
Josi didate: hats damatuek
Egin dute tirabira.
Entzun dezaket Patetikoa
Autoz abiatzen naizela
Negar gogoa dut Betikoa:
Ingumak ur daitezela.
Iruditu zait joan zarenean
Aditza dudala galdu
Eta menderik salbaienean
Ekia dela apaldu.
Zerua grisa delarik orain
Eror dadila elurra,
Maitasuneza dagoela zain
Estali dezala lurra...