SISIFORI IZKIN

Hedabideetan-eta idazten dugunontzat nahiz hedabideen jarraitzaileentzat, errealitatearen alderik neketsuena da eguneroko martxak ez duela atsedenik hartzen. Inoiz ez. Ezta udan ere, albiste gutxi ematen omen duen sasoian: guk atseden hartzen baitugu, munduaren ibilaldiak ere har dezala atseden. Alferrik, ordea. Hartan ere errealitateak uko egiten dio oporrak hartzeari: ez da falta izaten gerrarik, istripurik, eskandalurik, estimutan genuen norbaiten heriotzarik. Errealitatea ez da nekatzen, mendian gora eta mendian behera dabilen Sisifo nekagaitza da, eguneroko gertakarien harri tzarra garraiatzen.

Ez, errealitatea ez da nekatzen. Baina hedabideetan-eta errealitatea deskribatu nahian dabilena, bai, nekatzen da. Eta nekatzen da eguneroko gertakizunak arretatsu irakurtzen dituen lekuko interesatua ere.

Bada, errealitateak oporrik ematen ez digunez, norberak hartzea onena. Zuek, nik.