"IN VITRO" TRATAMENDUA DONOSTIAKO OSPITALEAN JASOTA, LEHEN UMEA JAIO DA

                                                                BERRIA, 2012-11-20

Ugalketa Lagundurako Unitatea 2005ean sortu zuten Donostian, eta urtarriletik dago martxan

Peru Goikoetxea Etxeberria da ugalketa tratamendua Donostiako Ospitalean jasota jaiotzen den lehen umea. Igande goizaldean jaio zen haurra, eta gurasoek Osakidetzako langileen aldetik jasotako arreta nabarmendu eta eskertu dute.

Joan den urtarrilean jarri zuten martxan ugalketa lagundurako unitate berria Donostian. Ordura arte, Gipuzkoako kasu guztiak Barakaldoko Gurutzetako ospitalera (Bizkaia) bideratzen zituen Osakidetzak. Horrek luzatu egiten zuen prozesua, itxaron zerrendak handiak baitziren. Unitate berriari esker, orain tratamendua Donostiako Ospitalean bertan egin ahal dute, hala behar duten bikoteek.

Uztailean, Donostiako Ospitaleko biologo Arantxa Genberek azaldu zituen tratamenduaren nondik norakoak: neskaren obulutegitik atera eta prestatu egiten dira obuluak. Mutilak hazia ematen du, prestatu, eta ernaltzen uzten dira. Hazia txarragoa denean, obulu bakoitzari espermatozoide bat sartzen zaio.

In vitro tratamenduaren bitartez jaio da Peru Goikoetxea. Igandean, hilaren 19an, 03:30ean jaio zen. 3,660 kilo pisatu zuen, eta umearen aitak, Jakes Goikoetxeak, adierazitakoaren arabera, ondo daude bai ama eta bai jaioberria.

Gurasoak, Mikal Etxeberria eta Jakes Goikoetxea, oso gustura daude hilabete hauetan jaso duten arretarekin. «Nabarmentzekoa iruditzen zaigu Osakidetzako profesionalek, langile finak izateaz gain, gurekin izan duten tratu humanoa».

Abian dira halako haurdunaldi gehiago. Lau intseminazio eginda hamar bikotetik zazpik haurdun geratzea lortuko dutela jakinarazi zuen uztailean Genberek.