DEMASA

Hona Excusatio non petita latin-ziri ezagunaren bertsio posible bat: “desenkusa eskatu ez dena, akusazio nabarmena”. Desenkusatuz hasiko naiz: giputza izan arren, pozik nago Athletic finalera iritsi delako, espero dut partida ona ikusiko dugula, eta asko poztuko ninduke zuri-gorrien garaipenak. Desenkusaren barneko tripek Erreal-zale moduan salatzen banaute, zer egingo zaio ba!

Baina desenkusa egin eta gero, nire burua salatzeaz gainera gehiegikeria salatu nahi dut. Eta ez naiz kaleko gehiegikeriaz ari (jendeak eskubide osoa du bere pozak nahi duen bezala ospatzeko), gehiegikeria instituzionalaz baizik, eta, nik dakidala, EITB erakunde publiko bat da.

Beharbada ez naiz jabetzen gertakariak herri honentzat duen garrantzi txit ahaztezinaz, eta hala balitz (beste desenkusa bat dator segidan) barkatuko ahal didate itsumena, uste osoan bainengoen beste batzuek zeudela seko itsu.

OHARRAK (Post scriptum)

Berripaperean agertutako zutabean, excusatio ordez accusatio ageri da. Irakurleren batek nire latin-ziri baten gisa hartu badu, ez zen hori nire asmoa. Hanka-sartzea egin dut besterik gabe. Euskaraz eman dudan, aldiz, ondo dago eta eskerrak! Eta desenkusaka ari bainaiz, betor esaldi famatua berriro ere nire kontra: "Excusatio non petita, accusatio manifesta".