Eliza terapeutikoa

Jakina da, gazteok elizarekin ez dugula feeling askorik. Kontua da aste honetan berriz ere, zoritxarrez, eliza batean izatea egokitu zaidala. Mezetan sermoi eta jainkoaren goraipamenen aurrean, niri ere inspirazio zerutiarra etorri zitzaidan. Ez dakit zientifikoki frogatua dagoen baina eliza terapeutikoa dela iruditzen zait. Adinarekin etorri ohi diren zahartrosien aurkako erremediorik onena.

Hasteko elizek askotan ez dute irisgarritasun egokirik. Ni egon nintzena behintzat aldapa ederra igota dago eta ondoren eskailerak igo behar dira. Hori bertara iristeko behar den paseoa kontutan hartu gabe. Beraz, hasteko eta berotzeko ariketa fisiko pixkabat.

Baina ez da ariketa fisiko bakarra. Gora eta behera ibiltzen zara mezan zehar, eseri, zutik jarri, eseri…  Gainera apaizaren arabera ariketa aerobikoa egin dezakezu zutik zaudela bere hitz aspertua luzatzen badu. Sasoian sentitzen bazara eta hori zuretzeko gutxiegi dela iruditzen bazaizu beti duzu aukera, belaunikatu eta gora-behera horiei zailtasun puntu bat igotzea.

Bukaera aldera, barrita energetikoen antzeko zerbait ahoratzen dizute. Ez dakit zerrekin dagoen egina baina jainkoaren indarra omen du barruan. Uste dut oraindik ez dutela sustantzia dopanteen artean sartu.

Ariketa fisikoa lantzen den arren, ariketa mentalak ere egiten dira. Memoriaren lanketa egiten da oso modu pedagogikoan, kantak eta erabiliz. Errezuekin ere egiten da ariketa berbera. Gainera apaizari jarraitzeko askotan gaitasun mental garatua behar da, honek dakarren buruko gimnasiarekin.

Eliza bilgune den neurrian ere sozializazioa dakar adineko jendearen artean. Asko mezatara bakarrik ateratzen dira kalera eta oso beharrezkoa da elkarrizketak izatea ditugun erreflexu berbalak ez galtzeko. Herriko txutxumutxu gehienen berri izan dezakezu eta partehartzaile izan txutxumutxuen zurrunbiloan.

Eta pentsatuko duzue hau dena garestia izango dela, hain zerbitzu osasungarriak izanda dirutza oradindu behar dela. Ba ez! Bakoitzak nahi duena ordaintzen. Zerbitzuaren erdialdera poltsa bat pasatzen dute eta zuk nahi duzun diru kantitatea botatzen duzu. Nahi baduzu etxeko giltzekin txapon soinua imitatu eta kitto, xoxik utzi beharrik ez. Aldiz mejora handia egin badizu edo primitiban zerbait tokatu bazaizu gehiago bota dezakezu. Zure esku!

Utzi alde batera pilates, wii edo brain training bezelako produktu garestiak. Joan elizara, eliza terapeutikora! Profesional xantuenek egingo dizute kasu! Ez galdu aukera! Zure osasunak eskertuko dizu, eta poltsikoak ere bai!