Uda beteko hiru zorion apur (Zorion apurrak VIII)

1.- Uretan freskatu ondoren, irten eta etzan, eguzkitan, eguzki bete-betean. Epeldu, berotu, kiskaldu. Eta gehiago ezin dugunean, uretara berriro, dzanga! Uretan freskatu ondoren, irten eta etzan, berriro eguzkitan, berriro eguzki betean. Berriro epeldu, berotu, kiskaldu. Eta gehiago ezin dugunean, uretara berriro, dzanga!

2.- Uretan freskatu ondoren, gerizpetan etzan eta irakurri, eta irakurri, eta irakurri... Harik eta esaten duzun arte: -Koño! ez litzateke gaizki etorriko garagardo hotz bat orain!

3.- Oheratu aurretik, isil-isilik, bakarrik eta inori ezer esan gabe, uretaraino hurbildu, bertan sartu, ahozgora etzan uraren azalean eta besoak zabal eta belarriak urpean dituzula, zeru izarratuari begira geratu. Bat-batean -ziiiiiiuuuuuuu!- izar lokak zeharkatu du izartegia. Pentsatu desio bat... Hmmmm... badakit!!