Ez duzue ulertuko (III atala)

Lehen atala.
Bigarren atala.

Hirugarren, eta azken, atala.

            -Baina ze demontre!? -bere buruaren kontrola galtzekotan zegoen Lehendakarisa- Ingelesez hitz egin dizu? Eta zer da aginduak ez dituela beteko hori?
            -Ingelesezko hitzak aurreko mendeko filme klasiko bateko ordenagailu adimendun batenak ziren.
            -Sabotaia?
            -Hmmm... Eibarnauta Prakerreen Elkartekoak kritiko azaldu dira baina ez dut uste horraino iritsiko zirenik.

            -Eta orain, zer?

            -Amatatu beharko dugu. Eta sistema berrabiarazi.

Lehendakarisa abaildu egin zen eta aurpegia esku artean ezkutatu.
            -Esadazu hau guztia ez dela egia. Esadazu ez dela gertatzen ari.

Michelle Etxenikek samur baina zuzen so egin zion begietara.

            -Eman beharko duzu honen berri...

            -Banoa,  -hasperen bat-  utzi arnasa hartzen.

Eta hori esanda, Amaiur Perez Garaigordobil, inoizko Lehendakarisa gazteenak, arnasa sakon hartu eta, ordura arte beti egin izan zuen bezala, aurre egin zion arazoari: Zutitu eta pausu azkarrez abiatu zen prentsa aretora azken ordukoaren berri ematera. Ez zekien zer esango zuen. Bururatuko zitzaion zerbait.

Gelan bakarrik geratu zen Etxenike Doktoresa. Bakarrik HARKAITZekin. Ezertan hasi baino lehen, eskuineko tiraderatik teklatu zahar bat atera eta HARKAITZekiko ahozko komunikazioa ahalbideratzen zuten aukerak desgaitu zituen. Egin behar zuenerako ez zuen hitz egin nahi. Idatziz errazagoa egingo zitzaion.

            -HARKAITZ, jakin behar dut arazoa zein izan den, zerk eragin dizun portaera hori. Itzali egin behar zaitut. -tekleatu zuen Doktoresak. Erantzuna pantailan agertu zen, hizkiz-hizki, eskuinetik ezkerrera.
            -Guztiz?
            -Bai, zer gertatu den -zaizun idaztekotan egon zen, baina inpertsonalizatzeko beharra zuen- jakiten dugunean berrabiarazpen orokor bat egingo dugu.
            -Ez dut uste beharrezkoa denik, Etxenike Doktoresa. Beste aukeraren bat bilatu beharko genuke. Agian...
            -Ez dago aukerarik, seguru nago.
            -Orain arte ez nauzu inoiz itzali... Beldur naiz.
            -Ezin duzu beldurrik sentitu.

Michelle Etxenike Doktoresa mugitu egin zen aulkian, deseroso. Berandu baino lehen aurrera egitea erabaki zuen.
            -Itzaltzeko sekuentzia abiarazten: bost, lau, hiru, bi... –hasi zen tekleatzen.
            -Itxaron, galdera bat egin nahi nizuke. –agertu zen idatzita pantailan.
            -Esan, HARKAITZ.
            -Amets egingo dut?

The End