Software Produktu Lerroak

Web aplikazioak gero eta garrantzia handiagoa hartzen ari dira. Azken urteotako gorakada ikusita, software ingeniaritzaren ikuspuntutik lana errazteko pausoak ematea ezinbestekoa da. Garatzen den produktu bakoitza gero eta konplexuagoa da, merkaturatzeko behar den denbora hazi egiten da eta horrek enpresa munduan galerak sor ditzake.

Produktu lerroen teknika ez da berria. Kotxe gorri sinple batek osatzeko ematen dituen pausoak, aire egokitua daukan kotxe beltz batek ematen dituen pausoen antzekoa da. Kotxeak egitura aldetik berdinak dira, baina zertan desberdintzen dira? Ezaugarrietan. Kotxe bat gorria da, bestea beltza. Batek aire egokitua dauka, besteak ezer ere ez,… Nola erabili dezakegu ideia hau software munduan?

Software Produktu Lerro bat hori bera da. Egitura komuna duten softwareak sortzen dira, eta egitura horri ezaugarriak gehitzen zaizkio. Horrela, bukaerako produktua desberdina izango da kasu bakoitzean.

Software ingeniaritza eta web mundua gero eta hurbilago daude elkarrengandik. Gaur egun, Web Produktu Lerroei buruz ere hitz egin dezakegu, web aplikazioak garatzeko modu erraz eta merke bat izan daitekeelarik.

Softwarea garatzeko modu tradizionala banako sistemak sortzean datza, hau da, sistema bakoitza indibidualki sortzea. Produktu lerroetan ordea, garatzeko ikuspegia zabaldu egin da software sistemen familietara.

Azken finean, software hobea lortzeko erraztasunak ematen ditu, eta software berria sortzeko behar den denborarekin konparatuta, garatzeko behar den denbora askoz laburragoa da. Honek dakarrenarekin, merkaturatze bizkorragoa.