90seg 2.0

Azken aldian ez dut askorik idatzi blog honetan. Esan nizuen aurretik ere irratsaio honek konstantzia zer den ez zekiela, eta oraingo honetan argi gelditu dela uste dut. Blogean idatzi ez baina blogen inguruan hainbat berriketa saio edukitzea suertatu zait, beste tresna batzuk ere ezagutu ditut eta nire burua martxan ipini da hauei aplikazio desberdinak aurkitzeko, baina lasai, izango duzue guzti honen berri ordua heltzen denean.
Momentuz, 90 segundutik behera irauten duten abestiei buruzko bigarren atala eskeintzen dizuet. Esan beharra dago programa hau berandu heldu zela, ez zelako iragarritako egunean egin. Bigarren atal hau, hirugarrenarekin batera egin zen ia ia, gaueko iluntasunaz baliaturik furtiboki (beste irratsaio batzuen emisioa galaraziz). Bertan beste hainbat proposamen interesgarri biltzen dira. Batzuk errepikatu egiten dute lehen emanalditik, Aphex Twin, David Holmes, El Club de los Poetas Violentos, John Lennon, Pearl Jam, Massive Attack eta The Distillers esaterako. Beste batzuk ordea, lehen aldiz sartu dira: White Stripes, The Supersuckers, Ramones, Pixies, Undertones, Squarepusher, Piratas, Mogwai, Hedtrip, Moby, Guateque All Stars eta Los Fresones Rebeldes besteak beste. Euskaldunen artean bakarra berriz ere, Bergaratik laster azalduko den talde bat gainera, Naiz Roxa izenekoa. Bakarra baina bi abestiz bere presentzia izan duena.
Eta hurrengoan zer? Zenek daki. Hirugarren atala prest dago. Aurrerapen bezala zera esango dizuet, euskal presentzia nabarmen handituko dela, Bergarako talde bat ere bertan aurkituko duzue. Hala ere, ezin dut ziurtatu noiz izango den hirugarren atalaren emisioa. Laugarren baterako ere materiala gertu dut jada, beraz, hasieran nuen trilogiaren ideia baztertu dut eta zerbait luzeagoa izango dela dirudi. Bostgarrenik egongo den denborak esango du. Gainera, beste testu bat lantzen ere banabil (bere izenburua:¿Como desaparecer completamente?) eta ideiak trumilaka sortzen zaizkit kaskezurrean barrena, guztiak lantzea ia ezinezkoa iruditzen zait, ... Aurreko batean ere esan nuen irratsaio honek linealtasuna zer den ez dakiela, beraz, zer egingo dudan hurrengo saioan asmatzea ezinezkoa da. Baita niretzat ere.
Onena pantailatik irten eta irratia piztea izango da, pantailatik kanpo ere bizitza existitzen baita.

Irratsaio hau zeureganatu nahi baduzu, egin klik hemen