Udalekuen balorazio positiboa egin du Hitzarok

Hitzaro elkarteak udalekuen balorazio positiboa egin du aurten. 132 haurrek parte hartu zuten ekainaren 24tik uztailaren 17ra egin ziren Plisti Plasta eta Txirristi Mirristi udalekuetan. Elkartearen aburuz, begiraleen arteko harremana, sortu den lan-giroa eta haurrek agertu duten prestutasuna dira aurtengo edizioaren arrakastaren oinarria.

"Haurrek primeran pasatu dute egin diren ekintza gehienetan", azaldu dute begiraleek. Izan ere, tokian tokiko jolasetan ez ezik -Plistikoek Urdaneta eskolan egin dute udalekua eta Txirristikoek Milagrosa eraikinean- herriko plazetan zein Goierriko beste herrietan ibili dira aurten. Gabiria eta Amezketa bisitatu zituzten Plistikoek eta Oiangu, Beasain eta Arama Txirristikoek.

Tailerrak, txotxongiloak, San Fermin jaia, frontoian merienda... hamaika ekintzetan parte hartzeko aukera izan dute aurten eta haurren zein gurasoen esker ona jaso du elkarteak hori guztiagatik.

Euskararen erabilera sustatzea, haurren arteko harremanak indartzea eta jolas ludiko eta didaktikoen bitartez udaldia gozagarriago egitea izaten dira Hitzaroren helburuak; aurten bete betean asmatu da.

Eskerrik asko parte hartu duzuen haur, guraso eta begiraleei! Datorren urtera arte.

(Zerikusia duten berriak)