Vilariñok su ematen Gabirian!

Ander eta Angela Vilariño anaiarrebek zailtasunik gabe irabazi zuten igandean Gabiriako Rallysprintaren 12. edizioa. Antolatzaileen aurreikuspen guztiak bete zituzten Vilariñotarrek lehendabiziko partaidetzan. Lehen zatian 4:19,90ko denbora eginda jarri ziren jada sailkapenaren buru, eguneko denbora partzial onena.

Joseba Zapirain-Estibaliz Armendarizek eta Joxe Labaka-Aitor Otaegik lagundu zieten Vilariñotarrei podiumean. Lehen erlojupekoak zehaztuta utzi zuen sailkapen orokorra. Gertutik jarraitu zieten Vilariñotarrei lehen itzulian Xabier Lujua-Txiki Burgosek (4:37,20) eta ez ziren urruti ibili Zapirain-Armendariz ere (4:37,60), baina ezin izan zuten hasieratik Vilariñotarrek ateratako 17 segundoko tartea murriztu.

Bigarren eta hirugarren erlojupekoek ere sailkapen berak utzi zituzten. Lujua-Burgosek utzi behar izan zuten lasterketa azkeneko erlojupekoan aldagailu kaxan izandako matxura bat tarteko; hirugarren zeuden behin-behinekoan, Zapirainengandik segundo bakarrera. 61 talde zeuden izen emanda eta 51 irten ziren; 41ek bukatu zuten hiru zatiko (6,5na kilometroko tramoa) lasterketa osorik.

Buruhausteak gurpilekin

Lasterketa hasterako izan zituzten buruhauste handienak pilotuek. Ibilbidearen egoera ikusita lehorrerako edo bustirako gurpilak, bietariko zein jarri erabakitzea zaila izan zuten. Aurreko astean egindako elurrak zikinduta utzi zuen errepidea, eta une askotan lurra lehorra, beste batzuetan umela edota gutiz bustita zegoen zorua. Lehen kilometroak guztiz lehorrak zeuden, eta horrek eraman zituen pilotu gehienak euritarako gurpilak, lehorrerakoak edo mixtoak aukeratzerako garaian zalantzak izatera. Besteek zer egingo zain, Vilariñok eta Lujuak lehorreko gurpilak aukeratu zituzten, Zapirainek euritakoak, tartekorik ez baitzuen eskura. Segituan argitu zen auzia, lehorrerako gurpilak jarritakoek asmatu zuten. Vilariñotarrak hamazazpi segundoko aldearekin Lujuari gailenduta, lehenengo posturako lehia ia itxita utzi zuten. Denbora berdintsua egin zuen Zapirainek ere, euritako gurpilak erabiltzeagatik puntuak galdu zituen ordea. Dena erabakita zegoen ordurako.

Giro ezin hobea

Goizean egindako euriteak eta egun osoko haize gogorrak ez ziren zaleentzat aitzakia izan Gabiriara joateko. Milaka pertsonak bete zituzten bide bazterrak, autoen lehen burrundaren zain, aurten ere Euskadiko rally denboraldiko lehen proba baitzen. Jende andana bildu izanagatik ez zen aurreko urteetako arazorik ikusi igandean (erlojupekoak atzeratu behar izatea, autoak erretiratu behar izatea...). «Jendeak izan duen jokabide garbia azpimarratzekoa da aurten. Rallyaren balorazio baikorra egin dugu Lagun Artean, eta zaleen jarrerak baldintzatu du hori», azaldu du Jorge del Cidek, Lagun Artea eskudieriako ordezkariak.

Eskualdeko pilotuak fin

Goierriko zortzi talde zeuden izena emanda, baina zazpi irten ziren Gabirian, eta seik amaitu zuten. Mikel Urkiola-Samuel Benitez ormaiztegiarrak izan ziren goierritar onenak (11.). Iñigo Izuzkiza-Jon Agirre mutiloarrek 16. postua lortu zuten, eta 20.etik aurrera geratu ziren Iriarte-Lonbide, Sarasola-Gereñu eta Juez-Esteibar. Xabier Alustiza-Xabier Altube legazpiarrak gogor hasi ziren, beti bezala, lehen partzialean 5. postuan sartuz Ibiza Juniorrarekin. Baina azken erlojupekoan matxura izan zuten.