Silvia Carrasco eta transexualitatea (eta III)

Familiei ere ikastaroak ematen dizkiete. Familiaren batek esaten badu "Baina zein astakeria ari zarete azaltzen?, gainera salto egiten diote giza eskubide zabalduak direla esanez, hau onena dela, umeak erreprimitzen ari direla eta faxistak, transfoboak eta abar direla. Jendea isildu egiten da, irakasleak isildu egiten dira eta erakundeek astakeria hauek bermatu egiten dituzte. Feministok bakarrik egin dugu protesta.

Hori nonahi gertatzen ari da eta adin txikikoen perbertsio gisa kalifika daiteke. Guraso askok bat-batean topatzen dute semea edo alaba ni hemendik aurrera gizona edo emakumea izanen naiz esanez. Adibideak milaka ditugu. Hori da gaurko aurrerakuntza; doktrinamendua eta errekrutamendua. Haurrei nahasmena eragiteko modua.

Estatuko estatistikak aztertu genituen, eta helduentzat pentsatuta zeuden tratamendu-unitate horietan beren gorputza baztertzen duten gero eta gazteagoak agertzen zirela ikusi genuen. Gero eta adingabe gehiago zegoen, eta gero eta neskato gehiago. Eta hau, nola ikasi nahi genuen? 2018an, Erresuma Batuko gobernu kontserbadoreak psikoterapian nazioarteko erreferentzia den Londresko Tavistock and Portman klinikako datu batzuk aurkeztu zituen, 10 urtetan 4.000 aldiz biderkatu zela zerbitzu horretan sexu aldaketa eskatzen ari ziren neskato nerabeen kopurua erakutsiz. Beranduago, 2020ko abenduan, neska gazte batek salaketa jarri zuen klinika horretan, bere gorputza errefusatze arazoak izanik, ia inolako miaketa psikologikorik egin gabe, hormona gurutzatuetara, histerektomiara eta bularren anputaziora bideratu zutelako, honela kontsultaren arrazoia konponduko ziotelakoan. Bere osasuna eta bizitza hondatu zizkiotela ikusita, salaketa jarri eta irabazi egin zuen. Horrek lagundu zion mugimendu feminista britainiarrari Erresuma Batuan onartu nahi zen Trans Legearen baliokidea gelditzen.

Feministok ikusten ari ginen alderdi askok, Podemosek batez ere, Erresuma Batuan, Frantzian edo Alemanian bezala, Trans Lege bat onartu nahi zutela… azkenean lortu zuten bezala. Datuak behar genituen Espainiako alderdiek erreakziona zezaten, Estatuan Erresuma Batuko gauza bera gertatzen ari zela ikusita. 2022an gutxienez 20.000 neska eta mutil adingabe zeudela horren eraginpean ondorioztatu genuen. Erresuma Batuan neskato nerabeen % 4.000 aldiz hazi baldin bazen, Katalunian neskatoen taldea % 5.700 aldiz eta Valentzian % 6.000 aldiz. Autonomia erkidego oso ezberdinak eta gobernatu duten alderdiak ere oso desberdinak izanagatik ere, arazoa berdin azaldu da. Gureak Erresuma Batua, Suedia, Finlandiakoak… baino datu okerragoak dira. Orain Trump ere gehitu da eta horregatik deitzen digute fatxa eta eskuindar.

2024an, MOEk berak esan zuen ezin dela adingabeen osasunarekin jolastu eta ezin direla pubertaroaren blokeatzaileak administratu. Faltsukeria zientifikoak saltzen ari dira, pubertaroa geldi daitekeela adibidez. Erabateko gezurra da eta ondorioak itzulezinak. Medikamentu horien tratamenduari dagokionez, esku-hartze kriminala egiten ari dira adingabeen hazkuntzan. Eta osasunean beste hainbeste.

Nor ari da astakeria hau bultzatzen? Alderdi politikoak eta sindikatuak. Ikastetxeek protokolo batzuk dituzte, parlamentu autonomikoek onartu eta gobernu autonomikoek ezarriak. Haiek erantzukizun zuzena dute. Sindikatuek ere oso paper garrantzitsua dute. Emakume eta gizonen arteko berdintasunaren defentsa gai, lesbiana eta bisexualen eskubideen defentsarekin ordezkatu dutelako LGTBIQ+ izeneko asmakizun politiko horren bitartez. Sindikatuen kasuan are larriagoa da, ideia horiek eskoletan eta familietan sartzea sustatzeaz gain, politika horiek gauzatzen dituzten irakasleak babesik gabe uzten ari baitira. Hori oso larria da, diru publikoarekin finantzatzen ari baitira.

Hedabideek ere badute ardura. Fundazio handiak dituzu, Soros Fundazioa adibidez, “ezkerreko” alderdi jakin batzuk bultzatzen dituztenak. Gizarte-hezkuntzan, unibertsitateetan eta aisialdiko begiraleen prestakuntzan ere sartu dira. Mugimendu feminista gaztez beteta dago, eta honako hau esaten ari dira: "A ze iruzurra transfeminismoaren kontu hau, gizonak ari dira gure postuak betetzen." Datu guztien arabera, alderdi politikoek jarraitzen duten estrategia korporatibo horietako baten aurrean gaude. Ez diete jaramonik egiten halako legediak aplikatzeko gogotsuenak izan ziren eta atzera egiten ari diren herrialdeei. Suediako Karolinska Ospitaleak (horkoak dira luzaroan horrelako ebakuntzak egiten aritu diren espezialista nagusiak, hala nola Tavistock britainiarra) 2020an adierazi zuen hori zela haurren aurkako eskandalurik handiena medikuntzaren historian, eta horretaz guztiaz damutzen zirela. Eta mediku pilo bat ateratzen ari dira esanez: "Onena egiten ari ginela uste genuen, konbentzitu egin gintuzten." Honek ez du inoren osasun mentala hobetzen eta, alderantziz, bizitza eta osasuna hondatzen die.

Nola da posible beste herrialdeetan mugimendu horiekin atzera egiten ari diren honetan hemen denek lehengo norabidean jarraitzea, azeleragailua sakatuz gainera? Horregatik daukagu Trans Legea Konstituzio Auzitegiko mahaian. Erresuma Batuko Auzitegi Gorenak honakoa esatera atera behar izan du: "Sexua biologia da. Emakumeak eta gizonak daude" Mesedez. Arrazoia, zientzia edo sen ona berreskuratu izanaren zantzuak daude. Eta, batez ere, jendea konturatzen dela hori oso kaltegarria dela gizartearentzat, batez ere adingabeentzat. Hau dena guztiz antifeminista dela gehitu beharra da; izan ere, emakume bat zer den ez badakizu, nola aplikatuko duzu berdintasun-politikarik?

Zer egin horren aurrean? Gurasoei dei egin beharko litzaieke ikastetxean bertan beste gurasoekin elkartu daitezen. Euskal Herrian Babestu elkartean izena emateko aukera bada. Sindikatu batean afiliatuta zaudetenok, zuen sindikatuan gai honekin zer gertatzen ari den galdetu, galdetu zuen alderdi politikoan. Irakasleok, ahal den neurrian, aurre egin arazoari. Taldean hobe.

Oso garrantzitsua da jendea informatzea, elkartzea, antolatzea. Amanda elkartea ere hor dago, oso garrantzitsua Estatu mailan, dagoeneko tratatuak izaten ari diren adingabeen familiak koordinatzen dituena. Eta, jakina, idatz diezagutela, eskatu kontsultak hezkidetzaren aldeko irakasle feministei -dofemco.org- eta gainerako mugimendu feminista errealei. Hedabideei idatzi oihartzuna egin dezaten. Isiltzen ez diren unibertsitateek protesta egin dezatela. Isilik egoteko denbora amaitu egin baita.

https://www.youtube.com/watch?v=NOYaNesT1mk

AURREKO ATALAK:

https://zuzeu.eus/kultura/silvia-carrasco-eta-transexualitatea-i/

https://zuzeu.eus/kultura/silvia-carrasco-eta-transexualitatea-ii/

joan mari beloki kortexarena

2025-11-29