Putin kolokan?
Andrew Napolitano AEBetako epailea izan zen 1995. urtera arte. Gaur egun idazle eta analista politiko gisa dihardu. Gaurko bideoan bere burua sobietologo gisa aurkezten duen Gilbert Doktorow analistarekin hitz egiten du. Honek egin dizkion hausnarketak harrigarriak egin zaizkio.
A.N. : Putin presidenteari egindako kritika zurrumurruak antzeman dituzu. Errusiarrak pazientzia galtzen ari al dira Putin presidentearekin?
G.D.: Trump jauna, Vance jauna eta Kellogg jauna errusiarrak zirikatzen ari dira. Nire ustez, presio horren eraginez, Errusiako telebista estatalean hiru estatubatuarrek Errusiari egindako kritika kaltegarriei oihartzun zabala eman zaie Putinekin leial samarrak diren edo izan diren programetan. Sumindura handiz hitz egiten dute Errusiarekiko errespetu faltaz eta zabaltzen den desinformazioaz. Adibidez, Trumpek Virginian bildutako 800 jeneralen aurrean egindako hitzaldian esandakoak, non esan zuen AEBek ohartarazpen gisa Errusiara bidali zuen itsaspeko nuklearra Errusiak teknologian duen zernahiren aurretik zegoela 25 urtez. Mespretxuzko adierazpen mota horrek eztabaida piztu du Errusian.
A.N. : Itsaspekoari buruz esandakoa ez da zuzena, ezta?
G.D.: Administrazioak esan dituen gauza asko erabat okerrak dira. Esaterako, Vancek kazetari bati esandakoak, Errusiako ekonomia gainbehera doala, borroka biziz beteriko hilabetean ehunka kilometro karratu eskas batzuetako aurrerapenek erakusten dutela gerra gelditasun moduko batean dagoela, Errusiak ezin duela irabazi eta abar. Adierazpen horiek oso gizon azkarra eta ongi informatua den Vancek eginak dira. Beraz, ez ditu esan jasotzen duen informazioa okerra delako, Putin probokatzeko baizik, Donald Trump bere nagusiak egin duen bezala. Irain horiek haserrea pizteko dira, eta eragina izaten ari dira. Higadura gerrak funtzionatzen duen ala ez eztabaida indartu nahi dute. Eta orain lehen baino gehiago entzuten da ez dela funtzionatzen ari.
A.N. : Trump eta gainerakoak Putin presidenteak gerra azkar dezan lortzen saiatzen ari dira, lehenbailehen amaitu dadin eta, horrela, Trumpek bere buruari haren amaieraren meritua eman ahal izateko? Trumpek kikildu al dezake Putin?
G.D.: Ez dut uste. Baina eliteak haserre ditzake. Eliteek gerra pazientzia metodikoarekin burutzen ari dela ulertzen dute. Ukrainako armada degradatzea da taktika, Errusiako hurrengo belaunaldiak horri aurre egin beharrik izan ez dezan. Nekatuta daude eta Mendebaldearen eskaladari begira. Beraz, hilabete gutxiren buruan bukatu beharrean, urte batez edo gehiagoz honek jarraitzeko aukera ikusten dute. Egungo hedabide errusiarretan ikusten ari naizenak iradokitzen du Vladimir Putin presidentearen aurkako balizko jauregi-kolpe bat prestatzen ari direla. Egoera benetan kezkagarria.
A.N. : Hori ia pentsaezina da botoen %82arekin aukeratua izan zen eta izugarrizko ospea izan duen gizon batentzat.
G.D.: Baina inkestek Putin fidagarria den, lider ona den, eta halakoak bakarrik galdetzen dute. Ez dute gerra behar bezala gidatzen ari den galdetzen. Klase politikoek ezetz esanen lukete. Baina langile errusiarrak ikusten du azken bi urteetan bere soldata hiru aldiz igo dela. Eta diruz lagundutako hipotekak lortzen dituela, laguntza handia lortzen duela haurrak dituzten familientzat... Beraz, gerrak aberatsago egin duela. Klase politikoak oso aztoratuta daude telebistan ikusten dutenarekin, estatubatuarrek paperezko tigreak direla esaten baitute haietaz.
A.N. : Agian klase politikoek nahi dute Putin presidenteak Kiev suntsitzea ordu pare batean Oreshnik jaurtita?
G.D.: Horixe zehazki.
A.N. : Operazio militar berezia poliki eta metodikoki ari da bere helburuak lortzen. Ukrainako armada apurka-apurka degradatzen ari dira. Klase politikoak ba al du zalantzarik Ukrainak gerra galdua duela?
G.D.: Eszeptikoenak kezkatuta daude une honetan Europan gertatzen ari denarekin, hau da, birmilitarizazioarekin, Errusiarekiko gerra baterako prestakuntzarekin. Eta operazio militar berezi hau zenbat eta gehiago luzatu, orduan eta mehatxagarriagoa izanen da Errusiarentzat hiru urteko epean. Putin jauna boteretik kentzeko prestatzen ari direla uste dut. Beste aukera bat ere posible iruditzen zait: Putinek egungo higadura-gerraren taktika burugabetze-kolpe batera aldatzea.
A.N. : Nola lor liteke Putin legez kargugabetzea?
G.D.: Ez dut uste hemen legezkotasuna arazoa denik. Gertatu ezkero, beharrezko aldaketa gisa aldarrikatuko da. Agian ohorezko karguren bat emanen diote, Medvedev gora bultzatu zutenean bezala. Ez dut uste inolako arrisku fisiko edo pertsonalik izanen duenik. Lehen formalki pentsaezina iruditzen zitzaidan, baina orain iritziz aldatu dut. Ezinezkoa da telebistan ikusten dudana goiko jendearen onespenik gabe gertatzea.
A.N. : Hori etengabe eta sistematikoki ikusi duzu ala duela gutxi?
G.D.: Seinaleak aspalditik gertatu izan dira, baina inoiz ez dira hain biziak izan. Ez zegoen Vanceren adierazpenak osorik erakutsi beharrik, Errusia lotsagarri utzi baitzuen. Hori egin izana zerbaiten seinalea da.
A.N. : Goi agintari militarrek ulertzen al dute gerra honen erritmo motel eta metodikoa, ala “Nagusi, buka dezagun hau astebetean, nahikoa iraun du eta” esaten ari dira?
G.D.: Ezin dut esan. Duela urtebete inguru, norbaitek esaten zuenean militarrak, jendea eta estatu nagusia Vladimir Putinen aurka konspiratzen ari zirela, gerra nola zihoan gustuko ez zutelako, nik berehala ukatzen nuen. Militarrei dagokienez, ez dut uste horretan ari direnik. Baina elite zibilei dagokienez, uste dut litekeena dela horrelako zerbait gertatzen ari izatea Vladimir Putinen inguruko pertsonen artean.
A.N. : Kremlinek kontrolatzen al du Errusiako telebista?
G.D.: Hori da zehazki nire ikuspuntua. Oro har, Errusiako telebista oso kontrol zorrotzaren pean dagoela uste dut. Albiste errusiarren transmisioaren zuzendari nagusiak ez du jokatzen goitik datozen xuxurlarik gabe.
A.N. : Norantz doa hau guztia? Goiz batean esnatuko al gara Kieveko gobernuaren eraikinak desagertu direla edo Vladimir Putin oporretan dagoela ikusita?
G.D.: Ez dakit. Edozein norabidetan joan daiteke. Seinaleek iradokitzen dute bi aukerak gauzagarriak direla. Ikusi beharko dugu nola egiten duen aurrera honek. Baina Errusian jende asko dago Karaganov politologo ospetsuak bezala pentsatzen duena Errusiak Europa mendebaldeko lekuren batean arma nuklear taktikoren bat jaurti beharko lukeela, potentzia serioa dela frogatzeko. Zalantzarik gabe, pertsona horiek iradokitzen ari naizen jauregi-kolpe motaren atzean egonen lirateke, baina une honetan ez dago hori jakiterik. Zain egon behar dugu, ea zer gertatzen den.
A.N. : Zure hausnarketak nahiko harrigarriak egin zaizkit, ez ditut beste inon entzun.
G.D.: Espero dut hau serioago ikertzea eta informazio iturri guztietara sarbide hobea izatea.
https://www.youtube.com/watch?v=cRqMfVPfWWk
joan mari beloki kortexarena
2025-10-03
Iruzkinak
Utzi iruzkina: