AEB banantzeko bidean?

Gaurkoan Glenn Diesen analista norvegiarrak Andrew Napolitano AEBetako Epaitegi Goreneko epaile izana elkarrizketatzen du. Estatu horren aparatu erraldoi eta indartsuaren gorabehera ugari argitzen digu Napolitano epaileak. Garbi du, ez epe luzean, AEBak banandu eginen direla hainbat estatu txikiagotan.

Estatu sakonak, inteligentzia komunitateak, bankariek, armadak, ez nuke esanen mehatxatzen dutenik, baina presio egiten diete presidenteei, beldurtuz, estatu sakonaren eta konplexu militar industrialaren nahiak bete ditzaten. Inork konpondu ezin izan duen arazoa.

Gauza bera gertatzen da zaintzarekin. Polizia federalari herrialdeko gailu mugikor eta eramangarri bakoitzean tekla sakatze bakoitza atzemateko aukera ematen dioten lege horiek iraungitze klausula bat izaten dute. Lege horiek amaitzear daudenean eta politikariak Ordezkarien Ganberan eta Senatuan sartzen direnean esanez: "Ez dut honen alde bozkatuko. Hau Konstituzioaren aurkakoa doa" inteligentzia komunitatearen bisita jasotzen dute bulegoan eta esaten diete: "Ezin diozu inori konta esatera noakizuna." Isilpean zin eginarazten diete eta bulegotik ateratzerako iritziz aldatu dute, zer esan zieten edo zer ikusi zuten ez dakigula.

Trump presidentearekin elkarrizketa bat izan nuen bere lehen agintaldiaren amaieran. Esan nion, "Zer gertatzen da JFK (John Fitzgerald Kennedy) artxiboekin?" Eta berak erantzun zidan: "Epaile, niri erakutsi didatena erakutsi izan balizute, zuk ere ez zenituzke argitaratuko. Eta galdetu nion: "Beno, nor dira horiek eta zer erakutsi dizute?" Eta berak esan zuen: "Egunen batean, 15 pertsona deia entzuten ari ez direlarik, kontako dizut". Ez zuen sekula egin. Beraz, armadako norbaitek hain gauza ikaragarria erakutsi zion, non iritziz aldarazi baitzuen. Mehatxuek, presioak, beldurrak, horrek guztiak agintzen du gobernu estatubatuarrean.

Inteligentzia komunitatea erabat kontroletik kanpo dago. George W. Bush ohartu zenean NSAren aparatua (etxeko espioitza) Defentsa Sailean zegoela, hau esan zion NSAren buruari: "Ez duzu Konstituzioaz kezkatu beharrik, ni bainaiz zure burua eta, komandante buru gisa, ez dut Konstituzioaz kezkatu beharrik" Horrek erakusten du gobernuan dagoen jendeak Konstituzioari ez diola jarraitu behar sentitzen duela. “Abertzale” izena duen legea, legeri ikaragarria dena, agente federalei legea saihesteko aukera ematen die. Epaile batek bakarrik eman baititzake erregistratze-aginduak, delituaren balizko kausa batean oinarrituta. Lege horri esker, FBIko agente batek erregistro-agindua prestatzeko baimena eman diezaioke FBIko beste agente bati.

Legea 2001ean sartu zen indarrean. Espioien eta agente federalen belaunaldi oso bat, “Ez kezkatu Konstituzioaz, egin egin behar dena, besterik gabe. Gero arduratuko gara gai konstituzionalez” ikasiz hazi da. Beraz, orain mundu guztia zelatatzen da eta berme konstituzionalak murrizten ari gara. Diruarekin zer egiten ari naizen jakin nahi baduzu eta nire banku-kontuari begiratu nahi badiozu, zertarako nekatu epaile baten aurrera joan eta delituaren balizko kausa frogatu, nire banku-kontua hackeatu eta zer dagoen ikusi besterik egin behar ez duzularik? Ez dio axola hackeatze informatikoa delitua izateak, FBIk jendea prozesatzen baitu. Konstituzioa formalki existitzen da, baina praktikan ez.

Bi CIA daude AEBetan. Batetik, gobernu federalak zer arrisku dauden jakiteko behar duen informazioa biltzen duten espioiak daude eta, bestetik, CIAren alderdi operatiboa dago, izugarria eta arriskutsua dena. Horiek dira 2014an Ukrainan estatu kolpea eman zutenak eta mundu osoan egiten jarraitzen dutenak. Barack Obamak Libia bonbardatu eta Gadafi koronela hil zuenean ez zuen armada erabili, CIA erabili zuen. Orain militarrak dirudite. Militarrek bezalako armak eta ekipoak dituzte. Izan ere, indar armatuen erabilerarako AEBetan legeak Kongresuaren oniritzia behar du. Baina CIAk zuzenean presidentearentzat egiten du lan. Beraz, orain presidenteak bere ezkutuko armada pribatua du, nahi duena nahi duen bezala hiltzeko erabil dezakeena. Presidente bakar batek ere ez dio amaiera eman arazo horri.

AEBetako gobernua heriotza naturalez hil daiteke, zorrak ezin izanen dituelako ordaindu. 37 bilioi dolar zor ditu. Kopuru hori 40 bilioikoa izanen da Trumpek kargua uzten duenean. Urtean bilioia baino handiagoa. Inongo gizartek ezin lezake luzaroan iraun zor horrekin. Trumpek zorra arbuiatzen badu -hori oso gauza ona izan liteke-, jende, gobernu eta erakunde asko zorterik gabe geratuko dira eta orduan inork ez dio berriro dirurik mailegatuko gobernu estatubatuarrari. Behartuta egonen da bere aukeren barruan bizitzera edo zergak dituen jendeari zukua ateratzera eta orduan iraultza bat egonen da. Beraz, modu batera edo bestera, hau gelditu eginen da.

Presidente honek ez du ulertzen ekonomiari buruz oinarrizkoena, ez du ulertzen muga-zerga bat azken kontsumitzaileak ordaintzen dituen salmenten gaineko zerga bat dela. Herrialde honetan dagoeneko nabaritzen hasia da prezioen igoera eta handitzen jarraituko du. Trumpek muga-zergak arma politiko gisa erabiltzen ditu. Muga-zerga bat zerga bat da, eta Kongresuak bakarrik ezar dezake zerga bat. Auzitegi federal batek eman du hori. Ez dakit zeintzuk izanen diren ondorio ekonomikoak muga-zerga horiek guztiak baliogabetzen badira. Orain Kongresuak ez du inoiz muga-zergen alde bozkatuko, errepublikanoek promesa pertsonal gehiegi baitituzte zergak ez igotzeko.

Telefono dei bakoitza eta tekla sakatze bakoitza entzuten dute gailu mugikor guztietan eta herrialdeko mahai gaineko ordenagailuetan. Denon sekretu guztiak dakizkite. Estatubatuarrak dira planetako pertsonarik zelatatuenak. Jendeari ahaztu egiten zaio hori, ez du portaera aldatzen, normaltasunez jokatzen du eta harrapatu egiten dute. Antonin Scalia epaileak esan zidan NSAk AEBetako Gorte Gorena zelatatzen zuela eta auzitegiko kideek bazekitela. AEBetako Gorte Gorena zelatatu badezakete, presidentea zelatatu dezakete, eta seguru asko hala eginen dute.

JFKri buruzko artxiboak zentsuratu egin dituzte. Inteligentzia nazionaleko zuzendari ohi batek esan zidan JFKren espedientea ikusi zuela eta ez zegoela deus han, 1963tik zaintza izan duten pertsonek ziurtatu zutela ez zela ezer egonen.

Kongresuak uko egin dio bere lana egiteari. Washington DC, Chicago, Los Angeles eta New Yorkeko polizien komisario izan nahi du presidenteak. Auzitegiek ez dute Konstituzioa betearazten. Konplexu militar industrialak eta lobby sionistak kontrolatzen dute Kongresua. Industria gune militarrak bilioi bat dolarreko aurrekontua du urtero, eta hori zentzugabea da. Arau konstituzionalik ezak eta zorrak AEBetako gobernua suntsituko dute. Gobernu federala kolapsatu eginen da eta AEBek dozena bat errepublika txikiagotan deseginen dira. Ingalaterra Berriak seguruenik bere Errepublika txikia izanen du. Texas beste bat izanen luke, Georgia, Hego Carolina eta Florida bat bakarra. New Jersey, segur aski New York doan lekuan bukatuko du, eta abar.

Estatuak ezin izanen ditu fakturak eta nominak ordaindu. Inork ez du berarentzat lan egin nahiko. Inork ez dio dirurik utziko. Dirua zor dien pertsonek ez dute zorterik izanen. Eta auzitegi federalek ez dituzte demandak onartuko.

https://www.youtube.com/watch?v=hbp5n-9FyUQ

joan mari beloki kortexarena

2026-01-26