Asuncionen egon-egonean: Hotel Santo Domingo

Badakit hotela arinau deskriba neuana, bai. Baina hamabost egun hamen pasa eta gero, zeozertzuk kontetako badaukodaz, euki.

Hasterako hotela non dagoan kokaute esango dot. Auzoan gitxitxo ibilia naz, baina ikusi dodan neurriyen jende arrunte bizi dan auzoa da, etxe gehienak solairu bakarrekoak, apalak, lur apurtxu bategaz ingeruen, eta danak bizimodu banakoak. Beste leku askotan bezalaxe, etxebizitza batzuk ozo dotoriek direz, azulejoak, adriluak, burdinezko hesiak, alarmak, kontzertinak... eta beste batzuk barriz sano umilagoak, adriluzko hesiya bai, baina ez oso altu. Auzo honetan kaliek ez dagoz asfaltaute eta harri latzez dago eginda kalie. Bertara sartzen diran kotxe guztiyek polito moteltzen deure abiyada hamen ibilteko. Hau dala, bestie dala oso auzo lasaie dirudi honek, ospe txarra badeko be. Nik kaleetan ibilite ez neuan jende arrarorik ikusi, ‒ egia esanda jenderik apenas ez neuan ikusi ‒, baie auzoa mugatzen dauan etorbideetan, autobus geltokitik paraje, indio dexente dago eskean, eta arriskutsuek ei.

Hotela, jaubearen esanetan, Doña Olga, hogeita hamar bat urte deko. Egituraren aldetik patio baten ingeruen eraikitako etxie da. Beheko eta lalengo solairuek ondo amaituek dekoz, baie bigarren eta hirugarren izin leitekezanak amaitu barik dagoz, eta hazurdura triste, baltz, arrea agerien daukie. Geletara joateko patioaren ingeruen dekozan karradera eta eskileretatik zehar ibili behar da. Parte baten, justu sarreriaren ganean dagoanean, gelak alkarren aurrean dagoz, bestela, enparauak balkoi antzeko baten dagoz patiora begira.

Hotel osoa kolore bero lasaietan margoztuta dago, berdea, larua, adrilu...

Santo Domingo hotela dogu

oso leku atsegina

hiri erdiyan oasia da

deskantsurako egina

bizitasune bere neurriyen

euki badeko jakina

inportantena ahaz ez daidan

egingo dot ahalegina.

Sukalde lana beti daukie

eskarmentuez beteta

oilasko papar xerra ogitan

plantxan ta txarri txuleta

entsaladeaz ala arrozaz

maisu eran prestaketa

afari eta bazkariyetan

besterik ez dago eta.

Gosaltzerako bilera dago

mahai txukun baten jiran

kafea eta egosia be

esnatzeko perspektiban

pastelak bere topa leitekez

baina euren narratiban

gure ogi zopak kafe esnetan

ez dakiye ze ete diran.

Eta langile ia guztiyak

dabiz betarte serioz

garbitzaileak sukaldariak

horrela doaz ta datoz

emakumezko adinekoak

aurpegi alaia arrotz

bi izan ezik beste guztiyak

jubilatzekotan dagoz.

Doña Olga da jaun eta jabe

beti pozik irripartsu

gogo itzelaz zure galdea

entzungo dautsu amoltsu

tratuan bere gozo-gozoa

baina ohartu naz aizu

berbetan sano eginagaitik

gitxitxu entzuten dautsu.

Santo Domingon ikusi dodaz

oilo zahar ta oilanda

enpresaria eta langilea

eta gazteen parranda

hala be egin behar dautsat nik

oraingoan propaganda

itxialdia egiterako

leku ederra izan da.