Asuncioneko gorabeherak bigarren aldian

Nola edo hala internetetik begiz jota neukon hotela, autobusetik jaitsi bezain pronto bila eta izena emon nauen. Akats handiye, kukuak oker joko leuke sartzeko ausardiarik baleuko... Leku itsusi, zahar, zatar, kaxkar eta zuzterbakoa. Gau bakarra pasa neuan bertan eta gero handik alde ein neuan.

Handik hogei metrora, barriz, Hotel Santo Domingo dago, askoz txukunagoa, askoz garbiyagoa, zabalagoa eta abegitsuagoa. Bertako jaubeak, Olga andriek, harrerea in ostan, gelea erakutsi eta bertan lotu nentzen. Hameko eraikuntza askoren moduen cuadra baten laurdena edo hartzen dau, eta berak be holango forma karratue edo deuko erdiyen patioa dekola, piszina eta guzti. Patio horretan landarak eurrez dagoz, palmerak, orkideak, kaktusak, zuhaixkak, alegriak, iturri-belar bat, altze-adar idea... eta hamabiak inguru kolibria etorten da bere mokoa lorietan sartzeko.

Barikue arratsaldie bertan pasa neuan hurrengo egunien PCR bat ein behar neualako Perure joan ahal iziteko. Arratsalde horretan zera ikusi nauen.

Hamen dagoan piszina ondoan

giroa dago edarra

mahaiaren bueltan berba eiteko

gastatu barik indarra

hor bikotea ikusi nauen

lasai-lasai, tirri-tarra

neska gaztie alde batean

ta bestean gizon zaharra.

Ordu bietan ohartu nintzan

han egozala mahi baten

adin aldea nabaria zan

ezin inori ezer ken

bizpahiru aldiz jagi zirian

edari bila joaten

sei bat orduten han egon ziren

garagardoa edaten.

Gizona bazan talentuduna

izan arren berbatia

isildu barik pasa eban ta

oso-osorik arrastia

neska aurrean egoan baina

ez aspertu edo tristia

neskak entzuten ei eutsan adi

esaten eban guztia.

Ganera gizon horrek baeukon

zorte onaren diztira

une batean ez dakit nora

neskea zan erretira

orduantxe jo eban mobilak

ta gizonak koiu di-da

erantzuteko gogotsu bota

eban “Amor de mi vida!”

Lehenengo agur maitagarria

berbaldia irekian

baina atoan gaia izan zan

familiya aitzakian

hortxe neskea ailega eta

lasai eseri aulkian

itauna dekot hau ikustean

neskak ba ete ekian.

Zortzitarako gaua da hemen

argia joan da ihesi

ta bikoteak egarririk ez

eserialdia hautsi

zenbat gelatan egin euren lo

itauntzea dau itsusi

gero goizean bikotea ez

neban gehiago ikusi.