AZAROAK 25 INDARKERIA SEXISTAREN AURKAKO NAZIOARTEKO EGUNA

Azaroaren 25a, Emakumeon kontrako indarkeriaren aurkako nazioarteko eguna, duela gutxi arte jendartean nahiz eremu instituzionalean aintzat hartzen ez zen eguna zen. Egun ordea, aintzat hartzeaz gain, indar politiko guztien aldetik “politikoki zuzena” den diskurtsoa eta irudia sustatzen ari dira. Gure ustez, horrelako sasi-jarduera politikoa eta itxurazko diskurtso horren bidez, instituzioek  indarkeriaren jatorrian duten erantzukizuna ezkutatu eta indarkeria bera jendarte patriarkalaren ondorio zuzena dela aitortzea saihestu nahi dute.

Emakumeon kontrako  indarkeria, indarkeria patriarkala, emakume eta gizonen arteko harreman hierarkikoaren ondorioz eta emakumearen gizonezkoarekiko menpekotasunean sakonduz, emakumeok sufritzen dugun indarkeria da eta jendarte honek eragiten dituen diskriminazio egoera guztietan du oinarria. Egun munduan zein Euskal Herrian dugun arazo politiko eta sozial larrienetakoa delarik.

2008a hasi zenetik 5 emakume erail dituzte eta duela ia bi hilabete beste emakume bat desagerturik dago, honek dakarren esangura politiko eta sozialarekin. Eraso sexisten inguruko gertakariak eta salaketak egunerokoa dira gurean. Elgoibarren 2006 eta 2007 artean 28 salaketa izan ziren (hirutik bat baino ez da salatzen!).

Administrazioen aldetik, emakumeon aurkako indarkeriari aurre egiteko martxan dauden lege, protokolo eta akordio instituzionalak,  ez dira praktikan jartzen ari edo/eta antzuak dira.  Ez dute ahalbidetu ez prebentzio integrala ezta babeserako neurri eraginkorrik ere. 2005ean onarturiko Berdintasun Legeak emakumeen aurkako indarkeriari buruz hainbat ekimen jasotzen baditu ere hutsune estrukturalak eta gabezi nabarmenak ditu. Legeak jasotzen dituen neurriak aplikatzeko ere, ezintasuna dago, mekanismo behartzaileak ez baititu jasotzen eta horien betetzeko dagoen borondate falta agerizkoa da.

Hau guztia gutxi balitz, administrazioek sustatzen duten itxurakeria salatu beharra dago. Izan ere, indarkeriari aurre egiteko politika integrala eta eraginkorra oztopatzeaz gain, mugimendu feministaren borroka eta zehazki indarkeria sexistaren kontrako borroka asimilatzeko saiakera iruzurtiak garatzen ari dira.

Elgoibarko ezker abertzalea