Apartheid politikoa Elgoibarko Arau Subsidiarioen eraberritzean

Joan zen plenoan aprobatu zen Planeamenduaren kontseilu asesorean ikusi ahal izan dugunez, Ezker Abertzalea kontseilu honetatik erabat baztertua izan da.

Beste alderdi guztiak, PP eta PSOEko faxistak barne, dute tokia biltzar horretan, baina herriko bigarren indarra –ANVren izenean joan zena- kanpoan geratu da, ez du ordezkaririk.

Herritarren parte hartzea bultzatzen dutela diote, baina Ezker Abertzaleko partaideak, -udal hauteskundeetan herritarren 1040 bozka atera zituztenak- ez dira ageri.

Ez hori bakarrik. -Ehun industrialaren- ordezkaria ikusi ahal izan dugu, baina langileen ordezkaririk ez.

Eta herri mugimenduen ordezkaririk ere ez dugu ikusi, ez gazte, ez nagusi, ez kultur talde, kirol talde edo giza mugimenduen ordezkaririk. Eta hauek ere, izango dute zer esan Arau Subsidiarioen aldaketan, ez?

Hau guztia ikusirik Elgoibarko Ezker Abertzaleak salatu nahi du,

1.- Alkatetzaren jarrera ez demokratikoa, Apartheid Politikoaren bultzatzaile bezala agertu baitzaigu, oraingoan, gai hau dela eta, Alderdien lege faxistaren gestore.

2.- Herritarren sektore oso baten ordezkaritza, ehun industriala hain inportantea izanik, herren geratu dela, alde bateko ordezkariak bakarrik daudelako.

3.- Herritarren inguruan garatu duten partaidetza, Sasi-partaidetza faltsua dela, herri mugimenduak baztertuaz –gazteak, jubilatuak, kultur eragileak, eragile sozialak, kirol taldeak ere ez baitute ordezkaririk-, egina baita, eta Udalaren aurpegia zuritzeko bakarrik balio duena (Nahiz eta herritarren ordezkariak borondate onenaz ibili).

Herriko arau subsidiarioen eraberritzea -Elgoibar etorkizunean nola izango den esango dutenak- inportanteegiak dira alderdi politikoen eta enpresarien esku uzteko. Ahalik eta herritarren partaidetza zabalena behar dugu.

Ezker abertzalea izan da, azken urteetan, eraberritze honen aldarrikapena egin duen bakarra, PNVak, auzo guztietan aldaketa puntualak eginez, hamar urtez, iruzur egiten ibili den artean. Eta, orain, benetan aldatzeko zoria heldu denean, baztartu nahi gaituzte, herria destrozatzen jarraitzeko.

Arau subsidiarioen eraberritze herritarra bermatzen ez bada, ohi dugun bezala, Jauntxo ez demokratikoen gustoko arauak izango dira. Txikitzaileak, konstruktoreen eta enpresarien menpekoak, etxegintza basatiarenak, eta gune industrial erraldoiak babestuko dituztenak. Orain arte bezalakoak.

Ez dezagun utzi hori gerta dadin, guztion onerako

                                                 Elgoibarren, 2008-11-0                 

                                                Elgoibarko Ezker abertzalea