AGIRIA

NAZIO BAT GARA

AUTODETERMINAZIOAREN BIDEAN..

EUSKAL HERRIA NAFARROATIK ERAIKIZ

William Shakespeare idazle klasikoak idatzi zuen ondoko profezia hau: “Nafarroa izanen da munduaren miragarria… ” .

Ez da izan Nafarroan askatasunaren alde egin ez duen belaunaldirik, eta orain guri dagokigu profezia haren lekukoa hartzea; alegia, historiak lapurtutako askatasuna berreskuratzea. Izan ere, mendez mende ibilitako bidearen ondotik datorkigu etorkizuna gu geuk idazteko ardura.

Askatasun goseak elkartzen gaitu, kateak hausteko premiak eta Nafarroa herritar librez osatutako nazio libre gisa ikusteko grinak biltzen gaitu gaur eta hemen. Horixe da belaunaldi bat hurrengoarekin mendez mende lotu duen zilborrestea. Amaiurren eta Noainen Nafarroaren askatasunarengatik borrokatu zirenak; guda karlistetan fueroak defendatu zituztenak; Errepublika garaiko borrokaldietan Euskal Estatutoaren aldarrikapena eta nekazarien -eta langileen- eskubideak bat egin zituztenak; Frankoren diktadurari oldartu zitzaienenak; eta baita Francoren ondoren ere, demokrazian sinistuta, Euskal Herriaren askatasun eta eskubideen defentsan jarraitzen dugunak helburu berdinaren alde borrokatu gara: euskal nazioaren batasuna ekarriko duen Nafarroaren askatasuna.

Eskarmentu latza izan dugu orain arteko historian, baina ikasi dugu askatasuna lortzeko bidea ez dela samurra. Euskal Herria askatzeko bide horretan oztopo nagusi bat dugu: lurraldearen zatiketa. 1980 urtean, “Pitxerraren haustura” izeneko artikuluan garbi iragarri zuen Telesforo Monzonek, esaldi honetan: “Estrategia argia da. Euskal nazioa apurretan zatitu nahi dute zati bakoitzak norabide ezberdin bat hartu dezan, pitxerraren berrosatzea ezinezkoa eginez”

Nafarroa bereizteko hamaika argudio baliatu dituzte espainolek eta frantsesek: gudak, traizioak, iruzurra, gezurra… edozer baliatu dute Nafarroak ez dezan askatasunik izan, edozer baliatu dute Nafarroak ez dezan izan munduaren aurrean agertzeko behar duen botere politikorik.

Gaur gaurko nafarrok badugu erronka haundi bat: XXI. mendeko historia idaztea. Eta erantzukizun horretarako gertu egon behar dugu.

Nolakoa den geure ardura, halakoa izanen da konponbiderako konpromisoa.

Konponbide demokratikoa lortzeko prozesuan parte hartuta, aukera ikaragarria izanen dugu errotik aldatzeko herriari bizkar emanda eraikitako egoera politikoa.

Prozesua bera demokratikoa izan dadin, Nafarroak parte hartu beharko du; parte hartu behar du elkarrizketa bidez akordioak lortzeko helburuarekin osatuko den mahai amankomunean. Prozesuak hiru oinarri izanen ditu: Estatuen inposizioa eta betoak bukatzea, lehenik; elkarrizketa demokratikoa izatea, bigarren; eta azkenik, herritarron egitekoa erabakiorra izatea prozesu osoan.

Euskal Herriak pairatzen duen gatazka egoera konpontzeko prozesuak bermatu beharra dauka nafarron eskubidea parte hartzeko, hasieratik bertatik eta aukera berdintasunean. Guri dagokigu, herritarroi, eragile sozialei, sindikalei eta politikoei erabakitzea nola parte hartu Euskal Herria osoan eragiten duen prozesu honetan.

Parte hartzeko deia eta gonbita egin nahi dizuegu nafar guztioi; “Nafarroa izanen da munduaren miragarria”, Shakespeareren profezia, bete dadin. Gure aurrekoengandik jaso dugun kemenak eskura jarri digu aukera historiko hau.

Abenduaren 2an manifestazioa eginen dugu. Manifestazio horrekin indarrak bildu nahi ditugu Nafarroaren alde, askatasunaren alde, Nafarroa kuttun eta miragarri honen alde, Nafarroatik Euskal Herria egitearen alde.

Zure atxikimendua eskatzen dugu. Bidaliguzu, mesedez. Parte hartu eta mobilizatu!