Gauerokoak - Josu Unzueta

---

Gauaren nondik norakoen azterketa sakona Josu Unzuetaren lumapean

 Gaua, heriotza, isiltasuna, goragalea, bakardadea, terrorea, paradoxa, zentzunikeza… ditu gai nagusi.

Gaua, erromantikoa, misteriotsua, animalia instintoak aske uzteko paradarik egokiena, hausnartzeko aukera eta barruko pentsamenduei soka luzatzeko askabidea. Horixe da gaua Josu Unzuetarentzat.

Azaleko irudiak argi uzten duen moduan, Diego Velazquezen ilustrazioarekin, barrokoko argi-ilunetan murgilduko zaitu Gauerokoak liburuaK. Umea eta erresinularekin hasi eta Neskatoa eta erresinula ipuin motzarekin amaitzen da. Liburuan ipuin motzak, poemak, pentsamenduak eta gauean sortzen diren malenkoniaz bustitako kontakizunak ezagutzera ematen ditu.

 
Gaua da guztietan protagonista eta gauean irakurri beharrekoa, izan ere non eta nola irakurri badu zerikusirik liburuak zabaltzen dizkizun sentimenduekin. Gaua, heriotza, isiltasuna, goragalea, bakardadea, terrorea, paradoxa, zentzunik eza… guztiek aurkitzen dute askatasuna gure baitan, baina betiere gauez. Ohean luze etzan eta egunari errepasoa eman bitartean sortzen diren zirrarak dira.

 
Kontuan hartzekoa da ezin dela kontakizun asko egun edo gau berean irakurri, hausnartzera gonbidatzen duen liburua baita. Egun eta gau eukiko zaitu pentsamenduak irakurritakoan hausnartzen, behin eta berriro hitzei birak ematen, zure bizitzari agian zentzugabekeri bati zentzua eman nahian.

Depresioak jota amaitu nahi ez baduzu behintzat, hona hemen gomendioa: irakurri poliki, gauero pare bat kontakizun edo poema, izan ere zure gorputzak edo buruak berak eskatuko dizu gelditzea.